| Nummer:oub0793 | Datum:13. Nov. 1463 | Überlieferung:Editie | Fundstelle:Ostfriesisches Urkundenbuch, I, S. 690, nr. 793 |
Die Kirchvögte und einige Einwohner zu Pilsum verkaufen dem Kl. Langen 10 Grase Kirchenlandes im Hamswehrumer Hammrich, genannt das Cromme Land, um für den Erlös den Kirchthurm erbauen zu lassen.
Wytlick, kundich unde openbaer sy alle den ghenen, de dessen brief sien ofte hoeren lesen, wo dat wy Enno Bentena, Tyaerd Eppena unde Hayo Tyadena, kerckvogheden unde inwoners to Pilsum, bekennen unde betughen claerliken in der waerheit voer allezweme, dat wy mit vrien willen unde voerberadenen moede, mit willen, raet unde vulboert unse ghenadighe joncker Ulrick, unser priesteren unde unse mene boeren, hebben vercoft rechtverdiges vries stedes copes, unde vercopen yeghenwoerdich in cracht desses brieves van onser hillighen weghen, deme besceden ersamen manne heeren Clauwes provest unde deme convente to Langhen, tien grase landes, gheleghen in Hamswere hamrick, ghenomet Cromme loend, [*] mit de ene syde streckende an den dyck unde mit de ene eynde an Ye Tyuchwey, welck lant ghegeven unde gheboket heeft salighe Tateke Ennena to sunte Viti altaer in onser kerken to Pilsum, voer ene summe gheldes, de ons kerckvogheden voerben. vol unde al wael is betaelt, de yersten penninck mit den lesten na onsen vollen willen unde ghenoeghe, des wy hen dancken, welck ghelt wy becostighet unde bestedighet hebben na raden unde willen unsers jonckers voerben. unde mene boeren, to tymmeringhe onser kerken toren, waeromme scal unde mach dat convent to Langen vorben. vrii ende veylich ewichlick bruken, vercopen, verwesselen, verhueren, unde hoere nutticheit daermede to doende sonder alle aensprake, soe dat wy kerckvoegeden voerben. willen unde scolen, unde onse nacoemelinghen in onser stede, boren unde ongheboren, willen unde scolen, deme convente voerben. een vry waerre wesen desser tyen grase vorscr., waer, wanneer unde woe vaken hen dat van noet is voer gheesteliken unde weerliken rechte sonder alle arghelist, hulperede unde nye vonde utghesproken. Des to tughen hebben hier jeghenwordich mede an unde over ghewesen de eersame man heer Bebbo, provest unde kercheer to Husum, Liouwert Vrouwena, Haytat, Enno Abekena to Hamswerum, Gheltat, Hatel to Oplewert unde ander vele guede luden. In orkunde der waerheit so hebben wy kerckvogheden vorben. vrientliken ghebeden heren Haytat, een bewaerre onsen kerken, in heer Syardes stede, onses kerckheers, unde heren Bebbo provest voerben. umme hoere inghesegele, de se witliken unde mit gueden willen hebben ghehangen to dessen brieve. Na der boerd Christi MoCCCCo unde LXIIIo, up sunte Brictius dach confessoris et pontificis.
