Hauptseite

Nummer:oub0836

Datum:18. März 1466

Überlieferung:Editie

Fundstelle:Ostfriesisches Urkundenbuch, I, S. 724, nr. 836

Regest

Der Häuptling Eggo zu Westerwold cedirt dem Grafen Ulrich sein Eigenthumsrecht an dem Schlosse zu Emden und allen Pertinenzien, und erhält dafür Ländereien bei Wichhusen und Loppersum.

lk Eggho, thoe Westerwolde hovetlingk, enkenne unde tughe openbair voer allen unde enen islyken besundern, de dessen brieff zehen, horen offte lesen, woe dat ick my vruntlicken unde lefflycken myd gantzen wyllen hebbe vordreghen, verlyket ende gescheiden myd deme eddellen walghebornen heren, hern Ulrycke, greven to Norden, Emeden, Grietziil, Aurike etc. unde here in Oestvriesland, van schelinghen, twydracht ende ghebreken, de ick hadde up dat sloet Emeden ende up andere erve, werve unde guedere bynnen Emeden unde bueten in Emesgher lande beleghen, in desser naebescr. wyse ende manyre: alzo clat ick Egghe vorscr. deme vorben. greve Ulrycke unde synen ervent edder naekomene myd vrygen wyllen, walbedachtes modes to gude ghescholden, overghegheven unde upghelaten, overgheve unde uplate teghenwordich in unde myd kracht desses breves allen eghendoem, ansprake ende thosaghe, de ick hebbe ghehaet up dat sloet Emeden myd syner rechticheit in der stad Emeden, unde alle erve unde werve buten edder bynnen Emeden gheleghen, to deme vorscr. sloete horende, unde doe dessen altosamen vorbenomed vullenkomelyke vortyghinghe ende quiitscheldinge umme der groten mercklicken koest, aerbeyt unde moye, de de vorben. greve Ulryck hevet in vorledenen tiiden ghedaen jeghen de van Homborch umme Emeden wedder to kryghende in syne hand, dat de vorscr Homborgher in besiit hadden; soe dat ick Egghe vorben. noch myne ervent, gheboern off ungheboern, in ghenen tokomenen tiiden wyllen overspreken edder klaghen up den eddellen upgenanten greve Ulrycke edder syne nakomene van des voirscr. sloetes rechticheyden, erven, werven, daerto behorich, weghene. Hiir enteghen hefft de velegenante greve Ulryck my Egghen vorgen. ende mynen ervent wedderumbe ghegheven ende upghelaten erfflicken ende ewichlicken to ghebruken den herd tho Wychusen[*] umme eyntrent van drehundert grasen, unde all wes daer van erven thohoert, vier stighe grase landes to Lopsum, unde alzodane erve unde guedere, alzo my Egghen upgenant van Ewen to Westerhusen is angheervet, daertho all dat erve, dat my is gheervet to Twyxlum unde Wyvelsum umme entrent van hundert grasen, unde all dat erve, dat my Egghen angheervet ys in Reyderlande van mynen olderen; unde daermede schal alle unwylle, schelinge unde klaghe, de ick Egghe hebbe ghehat unde hebben mochte unde myne ervent uppe den edellen velegenanten greve Ulryck edder syne nakomenen van des vorscr. sloetes rechticheyden, erven unde werven, in Emeden edder bueten, to deme sloete horende, alynghes unde ganslick all heel gheslichtet, nedderghelecht unde ghedodet ende byghelecht wesen to ewyghen daghen sunder alle gheverde. Vorder soe mach unde sal Egghe upgenant unde syne ervend des vorben. herdes to Wichhusen, des erves to Lopsum myd den anderen erven bovenscreven samptliken ghebruken vredesam unde eghelicken besitten, daermede to doen, de renthe daervan up to boren sunder jemandes tosaghe, unde men sal de erve unde gudere vorscr. umme ghenerleye sake wyllen bekumnern edder beletten, de ghewesen synd off vorrysen mochten in tokomene tiiden Egghen edder synen ervend; sunder welkere up den anderen to spreken edder tho donde hadde in tokomene tiiden van anderen enyghen saken, dat sal men brenghen unde holden myd rechte to sprekene unde to vorvolghene, wair syck dat van rechte gheboert. Hiir by an unde over in desser scheydinghe hebben ghewesen deghedingheslude unde schedesheren: de erwerdighe mester Johan provest to Emeden, Haye tor Papenborch, Coppen Hugynck, kastelleyn to Otherdam in den tiiden, unde Frederich van Brae, unde in der vorscr. schedynghe hebben ghewesen de strenghe unde duchtighe ritter her Onno to Ewessum, Gherd van Petkum, Snelgher to Uphusen hovetling, Hayke to Oldersum unde Haro, ghebrodere hovetlinge, Beno provest tho Utthum, mester Boel van Nes, Wessel tor Molen renthemester in Emeslande, Coep van Hede, Hinrick van den Kampe, knapen in Emeslande, Ayelt to Hynt unde ander vromer lude ghenoch alz tughe daertho gheeschet unde gheropen. Desses toe tughe unde vestinghe hebbe ick Egghe upgen. myn inghesegel wyllichliken heten hanghen an dessen breff; unde hebbe ghebeden mester Johanne vorb., Hayen tor Papenborch, Coppen Hugynck unde Frederiche van Brae dessen breff mede myd eren inghesegele to beseghelende. Des soe hebbe wy mester Johan Vredewolt, Coppen Hughynck, Haye tor Papenborch unde Frederich van Brae vorscr. to merer kennysse der waerheit umme vruntlicker bede wyllen unse inghesegel mede ghehanghen an dessen brieff. Nae der bort Christi vierteynhundert jaer, daerna in deme ses unde sestighesten jare, ame dinxdaghe nae deme sondaghe Letare, alrenaest volghende.

Recto:

«‹›»