Graf Ulrich verbündet sich mit einer Reihe Ostfriesischer Häuptlinge zur Fehde gegen Butjadinger land.
Wytlick unde kundich sy all den ghenen, de dessen breff zehen, horen offte lezen, dat wy her Ulriick, greve to Norden, Emeden, Auricke, Grietzyl etc. unde here in Oestvriesland, Sibo van Doernum ritter, to Ezense, Stedestorpe unde Witmunde hovetlingk, Tanno Duren to Jever, Oestringhen, Rustringhen unde Wangherland, Lubbe Onneken to Krypense unde Aelke to Inehusen hovetlinghe, uns hebben vorenyghet unde vorstricket upp de inwoners des landes to Butejade, durende viff jaer na data desses braves upp Michaelis neystkomende, [*] soe dat wy samptlicken scholen unde willen upp desse vorscr. inwoners to Butejade holden unde voren bynnen desser vorb. tiid ene veyde unde ene sone, unsser nemand tovoren myd en aff to sonende, id en sy samptlicken mid unsen willen, soe dat wy tosamende bynnen desser vorg. tiid myd en willen sonen und veiden; unde wert sake, desse van Butjade jemande van heren offte steden bynnen desser tiid upp unse argheste to ziick to hulpe weren teende offte brenghende, soe willen unde schullen wy desulven ere hulpers, gheliick den van Butjade, ze haten, veiden unde schaden, unde se voer unse openbaere viande holden. Oek soe hebben wii uns vorenyghet unde vorbunden in kracht desses breves, wert sake jemand uns dachte bynnen desser vorscr. tiid van heren offte steden anlanghen unde veyden twischen der Emese went uppe de Jade, soe loven wy malekanderen desset truwelycken twischen der Emese went upp de Jade myd lyve unde gude helpen keren unde beweren, unde wert jemande van uns bynnen desser tiid unsser vorstrickinghe, dat God vorbede, vorstorve, soe schollen unde willen wy synen kynderen unde rechten erven upp unse anlanghers mid lyve unde gude truwe bistand ende hulpe to donde. Vortmer so loven wy vorscr. parte bynnen desser vorben. tiid wy under malckanderen steden vasten vrede to holdene. Wert sake jenich unwille, dat God vorbede, bynnen desser tiid twischen uns vorrese, so schollen wy den unwillen up veer vrome mans bynnen Vreschen palen zetten, uns in vruntscappen offte rechte in unse twidracht biirinne vorscheden, unde dat vorbund allykewal in vuller macht to blyvende. Alle desse vorscr. artikell unde stucke loven wy her Ulriick greve, Sybo van Doernum ritter, Tanne to Jever, Lubbe Onneken to Krypense unde Aelke to Inehusen, hovetlinghe, voer uns unde unse erffnamen stede unde vast by unser eere unde truwe under malckanderen unverbroken to holdende. Desses to tueghe hebben wy her Ulriick greve, Sybo van Dornum ritter, Tanne to Jever, Lubbo Onneken to Kripense unde Aelke to Inehusen, hovetlinghe, unsse ingesegel witliken ghehanghen to dessen breve. Ghegeven na der bort Christi dusent vierhundert unde tsestighesten jare, ame mydweken voer Michaelis arghangeli. (!)
x
| Editionen |
E. Friedländer, Ostfriesisches Urkundenbuch I (Emden 1878), nr. 842 |
