| Nummer:oub0864 | Datum:25. Sept. 1468 | Überlieferung:Editie | Fundstelle:Ostfriesisches Urkundenbuch, I, S. 752, nr. 864 |
Hayng Aldirsnazoen zu Norden verkauft dem Propst und Häuptling Aild Beninga drei Grase Landes.
Wytlick, kundich unde operbar zii allen guden erbarn luden, de dussen openen breff zeen, horen edder lesen, wo ick Hayng Aldirsnazoen to Norden hebbe vorkoft, myt wylle unde conzent Amka myner echte husfrouwe, vryes kopes, unvordruncken, myt vulberadene mode, dre grase landes, gheheten lytka Ayldir, gheleghen by Ayld prowest etfenne, langes by den wech, deme erbarne Aylde, hoftlyngh to Grymessum ende to Wirthim, provest tho Hynt, dat gras vor 21 Arnische golden, welk[*] vorben. lant zullen wy Ayld ende Amka vorben. qwyt ende vry holden vor uns unde unze erfnamen, wente uns den ersten pennyng myt dem lesten vul ende al betalet ys na unzen wyllen, zo dat Ayld hofftlyng vorben., zyn kynder ende zyn erfnamen, moghen die dre graze landes vorben. bruken, zetten, vorwesselen ende vorkopen na oren vryen wyllen tot ewighen tyden zunder al ansproke myner vrenden. Hiir an unde over hebben ghewezen thugislude als by name here Thiarck, kerchere to Grimyssum, ende Yno Redlifsna to Norden, Abko, Emo voghids knecht. To eyn tuchnysse dusser warheyt so hebbe ik Ayld Hayngzna ende myn husfrou vorscr. ghebeden den ersamen kercheren to Wyrthim ende Emo, voghet tho Norden, over my dussen breff to besegelen, wente ik sulven gheen een bruke; ende wy here Gheraldus ende Emo voghet vorscr. umme bede wille Ayldes vorscr. ende ock to eyn tuchnysse, dat wie hir an ende over hebben ghewezen, (hebben) unse inghesegele an dussen breff ghehanghen. Int jar als men screff na der bort Jhesu Christi unses Heren duzent vyrhundert in deme achte ende sestychsten jar, des sondages vor zunte Mychagelis dach archangeli.
