| Nummer:oub0882 | Datum:1469 | Überlieferung:Editie | Fundstelle:Ostfriesisches Urkundenbuch, I, S. 762, nr. 882 |
Der Häuptling Sirk zur Friedeburg und Reepsholt und dessen Bruder Haro übertragen dem Hero von Dornum usw. die Friedeburg mit allen ihren Pertinenzen.
Wy Cirick, tor Vredeborch unde Repesholte hovetlinck, und Hare to Sibkewerdum, [*] gebroeder, bekennen in crafft dusses breves vor alle de gene, de den szeen eder hoeren lesen, apenbar, dat wy myt vrien willen, vorsateliken, myt wolbedachten vorberadenen mode, in suntheit unses lyves, den edeln und erbern junchern Hero van Dornum, to Esenze, Withmunde unde Stedestorpe hovetling, unde synen erven, so wy syne naturliken vorwanten unde undersaten gebaren syn, de Vredeboreh myt alle der rechticheit vor allen anderen, de uns van blodes wegen tokamen eder anders vorwant synt, ghegeven unde upgedregen hebben, so dat he vort na unses lyves afganghe schall unde mach de Vredeborch innemen, eder dorch syne vormunderschup ofte vulmechtigen innemen lathen, unde to eynen ewigen erftale besitten myt allen den undersaten, kerspelen, burschuppen, dorperen, visscherien, gemoerten, bussche, heide, weide unde alle tucht cleyn unde grot nichtes darvan utbescheden, so ick Cirick de betherto ingehat unde noch in brukinge hebbe, besitten unde beholden mach sunder jemandes wederseggent. Unde ick Cirick hebbe tovorn bescheden, offt ick ichteswes schuldich were ofte in nakamenden tiden schuldich worde, desulven schall vorgescreven Hero van Dornum van mynerwegen betalen, und mynen broder Haren mit allen nottrufftigen dyngen besorgen und underholden. Queme ock, dat ick Sirick knechte, lude, provanden unde krut tor Vredeborch behoff krege, darmede schall he my ock alletit to entsettende vorplichtet wesen, byvall doen, unde na synen hogesten vormoge entsetten unde nicht vorlaten, unde offt Hare myn broder unde ick umme unser selen salicheit willen ichteswes in closteren eder kercken in Gades eer geven worden, schall men uns nicht vorbeden moghen. Alle desse artickell unde puncte bavengescreven lave wy Cirick unde Har (!) gebroeder myt sambder hant unde itlich van uns beiden besundern vorgedachten junchern Heren van Dornum unde synen erven, gebaren unde ungebaren, sunder alle argelist woll to holden. Dar by an unde aver synt gewesen unde vor tugeslude by geeschet worden de erberen knapen Dirick van Dinckelage unde Wulffert van Bersen, nu tor tit droste tor Nyenborch. Tho wider bevestinge der warheit hebbe ich Cirick hovetlinck vorg. myn rechte ingesegell, dat Har myn broder hirin mede to gebruken leth, vor uns beiden beneden an dessen breff witliken heten hangen. In den jaren Christi, do .men schreff dusent veerhundert, darna in den negen unde sestigesten yare.
