| Nummer:oub0889 | Datum:20. Juni 1470 | Überlieferung:Editie | Fundstelle:Ostfriesisches Urkundenbuch, I, S. 767, nr. 889 |
Die Witwe des Häuptlings Lutet Manninga, Adda, trifft letztwillige Bestimmungen über ihr Vermögen, und klagt über Gräfin Theda.
Ick broder Everd, prior des convents tho Nordenn Prediker orden, erkenne und wittlick do apenbar in dessen beseghelden breve vor allen vramen luden ghestelieke und wertlick, dat de erwerdighe vrouwe Adde, tho Bergum und Lutedesborch vrouwe, greve Ulriches vulsuster seleger dechtnisse, hefft oer testament schriven lathen und volbordet in myne jegenwordicheyt in desser maniere effte wyse, als hier volget van worden tho wordenn: In nomine Domini. Amen. Ick vrouwe Adda clage uppe de eerwerdigen frouwen[*] Teden, grevinnen, und ere kinderenn van saligen Tiarcqwen[*] wegen. Int erste dat veerde part der Gret, mitt tymmer und arve. Item to Pilsum dat verde part van den erffguderen. Item dat verde part van tymmer und erve to Manslachte, und den halven huysradt, und dat halve smydewerck, also ener guden vrouwen bort tho dragenn, alse eyne pale, ene orringher, en span, en esschare, [*] en bagher, achte strengene ryngher, [*] enen gulden mantel und ander sulverwerck, alse enen guden frouwen thobort, und de helffte van den schenckvaten. Item dat verde part tho Berum, erffguder und tymmer, alser by oldinges is gewest, esche ick van der Gredt, Manslacht und Berum. Und desse vorg. anclage hebbe ick gelathen to ener vruntschup uppe sess styge golde Rynsche gulden jarlinger[*] rente und duysent Rynsche gulden in golde vor smydewerck unde huysradt und vor tymmer, und en sulveren schenkvat van den twen een, [*] dat yrs ey effte den pellican, und de achterstellinge rente to blyven by guden luden. Weert oeck sake, dat der eerwerdigen vrouwe Teden und eren kinderen des vorduchte, dat de vruntschup eer tho grot duchte, so schoelen myne kinderen des blyven by enen lantrechte und guden luden. Hyr by an und aver synt gewesen her Bernt, abbet tho Norden, her Dithmar tho Peuwsum, her Herman, capellan tho Haghen, und her Poppe, Marckell Tetten, Haytet tho Husum, Tyarck Uldingen, Manne Erkena, Tyarck Harhena und andere gude lude. Und des tho merer bekentenisse so hebbe ick broder Everd vorg. myn segel hangen an dessen breff. Int jar unses Heren dusent verbundent und seventich, in profesto corporis Christi.[*]
