| Nummer:oub0904 | Datum:28. März 1472 | Überlieferung:Editie | Fundstelle:Ostfriesisches Urkundenbuch, II, S. 7, nr. 904 |
Der Minoritenordens-Provinzial von Köln, Hermann, ernennt Heinrich Mathie und dessen Frau Geseke zu Emden zu Procuratoren des Klosters Faldern und gewährt ihnen nach ihrem Tode die Feier von Seelenmessen wie für Mitglieder des Ordens.
Christo Deo devoto Hinrico Mathie et Geseke eius uxori, Emede commorantibus, frater Hermannus, in
sacra theologia magister ac fratrum minorum provincie Coloniensis minister et servus, salutem et pacem in Domino sempiternam. Devocionem, quam vos ad ordinem nostrum pia fratrum relacione habere cognovi affectum sincere caritatis acceptans dilectioni vestre vicissitudinem rependere cupiens, salutarem vos ad confraternitatem nostram ac universa et singula nostre provincie suffragia tam in vita quam in morte recipio, plenam vobis missarum, oracionum, officiorum, predicacionum, jejuniorum, elemosinarum, peregrinacionum, disciplinarum, vigiliarum, abstinenciarum, devocionum, votorum, observacionum, castigacionum, contemplacionum, meditacionum, studiorum, exercitacionum et omnium bonorum operum participacionem tenore presencium concedendo, que per fratres michi commissos operari et acceptari dignabitur clemencia Salvatoris. Insuper ob singularem devocionis fervorem, quem ad ordinem nostrum predictum et eius institutorem, Christi signiferum sanctum patrem Franciscum, geritis, vos in procuratorem nostri conventus Phalernensis prope Emeden recipio, volens vos gaudere privilegiis et libertatibus, quibus tales procuratores a sede apostolica largiflue sunt suffulti, scilicet, quod tempore interdicti interesse poteritis divinis, dummodo excommunicati non fueritis, nec causam dederitis interdicto. Addo preterea pro vestre sincerissime devocionis desiderio de gracia mea speciali, ut quandocunque vester obitus, annuente Domino multo tempore differendus, nostro fuerit capitulo provinciali nunciatus, fiat pro vobis idem officium vel suffragium, quod pro fratribus nostris defunctis annuatim fieri consuevit. Datum anno Domini millesimo quadringentesimo septuagesimo secundo, in vigilia Pasche.
