| Nummer:oub0915 | Datum:Wittmund, 10. Juni 1473 | Überlieferung:Editie | Fundstelle:Ostfriesisches Urkundenbuch, II, S. 15, nr. 915 |
Vertrag zwischen Gräfin Theda und dem Häuptling Edo zu Jever, über den Geltungswerth der Jeverschen Münzen in Ostfriesland, und Versprechen Edo's, binnen zehn Jahren ohne Zustimmung der Gräfin keine neue Münze zu prägen.
Tho weten, dat an deme donredaghe yn der hilgen Pinxten weken, in deme dre unde seventigesten jare deme mynre tale, tho Wythmunde yn deme sale, ys vorramet unde uthghesproken eyn vrundlick gudlick unde bystandlick compact unde vordrach twyschen der edelen vrow Theden, grevynnen in Ostvresland, uppe de enen, unde junckeren Eden, tho Jever etc. hovetlingh, uppe de anderen halven, dar de erber unde ghestrenghe her Szijbe ritter, van Dornum, tho Esensen, Stestorp unde Wythmunde hovetlingh, vor eynen overman, unde de erssamen Haye tor Papenborch, Snelger tho Uphusen, Here Mauricii Kancken tho Dornum hovetlinghes, Thyard Popken, Tyarick Alberdes unde Hayke, voghet tho Jever, worden ghekoren vor myddelere van en beyden delen, alse umme des geldes wyllen, dat tho Jever ghemuntet ys by zelygen Tannen Duren tyden thovoren unde junckeren Eden tyden na, so dat sodane ghemuntet geld schal unde mach gan unde gelden in der vorgescreven grevynnen ghebede unde landen yn der weerde, alse zelygen greve Olrikes ganghe unde werdych ys; unde so en wyl unde schal de erben. juncker Ede neyne munte bynnen synen landen in dessen negesten teyn jaren erstvolgende na datum desses breves ansetten, hebben edder holden, behalven dat ghescheghe myt wyllen, wulbort unde na raede der vorgescreven grevynnen, heren Syben unde anderer guder vrunde. Hyrup wyllen unde schullen de beyden delen malckanderen gunstych unde vrundlick wesen. Unde dat my Ede desset in vorscreven wyse so belevet heft, hebbe yck myn ingeseghele tho eyner wytlycheyd drucken heten benedden upt spacium desses breves. Datum ut supra.
