| Nummer:oub0923 | Datum:6. Dez. 1473 | Überlieferung:Editie | Fundstelle:Ostfriesisches Urkundenbuch, II, S. 23, nr. 923 |
Hato Sebena zu Upleward schenkt dem Kloster Heiselhusen 2 1/3 Grase Landes, um sammt seiner Frau der guten Werke des ganzen Ordens theilhaftig zu werden, und bestätigt die Schenkung auf dem Krankenbette.
Ick Hato Sebena, inwoner to Pleghewert, enkenne unde betughe myt dusser openen bezeghelden breve vor allen guden erberen luden, de dussen breeff zeen offte horen lezen, wo yk by sunden offt mechtyghen lyve unde darna confirmeret in kranckheit mynes lychams vor dat hyllyghe sacrament in antwort voler guder lude da hebbe ghegheven unde gheve yeghenwordych myt vuller rade unde beradens modes, alle nye vunde unde hulperede uetghezecht, dardehalff grase tyllandes, gheheten in de langhe Kael, in Pleghewerder hammerk, deme huse offte kloster to Hezeldehuzen, so dat myn zeel, myn husfrouwen zeel unde al unse vrunde zelen zolt delafftych werden alle de gude werken, de dar scheen in eren gansen oerden. Hyr an unde over hebben ghewest vor tugheslude by zunden lyve here Focke myn kerkhere, her Johan prebendarius, Etta Tydena unde Gheltet Enkena; in myn leste kranckheit echtes [*] her Focke, Ettha Tydena, Heddo Emeko Zyckena unde anders vole guder lade. Dusses to ener merer staerknysse unde waerheyt, zo heb (ik) Hato erghenamt unde wy tugheslude vorben. ghebeden unsen kerckheren als heren Focken, dussen breff vor uns tho beseghelen; zo heb yk her Focke umme de waerheyt dat my kundych is van dusser zake unde umme de bede dusser vorghescr. myn inghesegel doen hanghen beneden an dussen breeff. Int jaer unses Heren, als men screeff na Godes boert dusent veerhundert dre unde tzeventych, up den dach Nycholay des hyllighen byschops.
