Bündniss zwischen dem Bischof von Münster und Administrator von Bremen einerseits und der Gräfin Theda von Ostfriesland, Hero Omken und Edo Wiemken zu Jever andererseits gegen Graf Gerd von Oldenburg.
Van Goedes genaden wy Hinrick, biscop to Munster unde der hilgen kercken to Bremen administrator voir uns unde unse lande, luede unde undersaten unses stichtes van Bremen an eyne, unde Thede, greffynne in Oestvriesland, wedewe, voir uns, unse kyndere unde unse lande, luede unde undersaten unde voir unse tostenders, Heren Ommekens, zeligen hern Syben sone, und Eden Wymmekens to Jever unde eren undersaten an de anderen syden, doen kund, als wy unde de unse vorscr. vast langhe dorch unde van greven Gherde van Oldenborch unde synen tostenderen to water unde to lande wedder God, eren unde recht overfallen, gherovet unde beschedighet syn unde noch daghelix werden, soe bekennen wy, dat wy uns nu umme uns unde den unsen sulkes overfalls, rovens unde beschedigens tegen den vorscr. greven Gherde unde synen tostenderen up to holdene unde oek sodanne schaden to vorhalene myd eyn andern guetlichen tohope ghesatt unde vorenyghet hebben, to hopesetten unde vorenyghen myd desen breve, alzoe dat wy parte vorscr. des ergenanten greve Gherde van Oldenborch unde der syner tuschen dyt unde Pynxsten nestkomende offte ummedentrynd ungeferlich vyande werden, unde en vyantlichen doen sollen itlich van uns parten, syne frunde unde undersaten, in den reysen unde bestallingen men in desser veyde doende werdet bynen unde bueten landes, myd cost, pryvanden, reytschap und anderer noytrofft to besorgene, unde en sollen noch en willen ock wy noch de unse vorscr. malckanderen nycht vorlaten unde ock myd den ergenanten greven unde den synen nych zoenen noch vreden eder jenich bestand anghaen, uns en sy erst eren unde recht van en wedderfaern, off dat en ghescheghe dan myd unser beyder parte consente, wete unde willen; unde in hyrup bekallet wy Hinrick biscop vorscr. up dat reysend int velt avertreckent, bestallent unde anders des jennen dairto noyt syn mochte in unsen stichte van Bremen bespreken unde dan dairaff uns Theden, greffynnen, unde anderen vorbenompt alle bescheyt weten laten sollen nae to richtene. Unde offt uns God aventuer gheve, wy de heerscappe Oldenborch unde Delmanhorst bekrefftigeden, wes dan den Vreeschen palen van oldes tobehoert hevet, solde by Vrieslande blyven, unde dat ander solde uns Hinrik biscopen etc. unde unsen ghestichten tofallen. Unde dessen in orkunde hebben wy Hinrik biscop unde Thede greffynne voir uns unde unsse undersaten unse segele, unde ick Here Maurises voir Heren Ommeken, soe he noch nyn eghen segel en hevet, myn, unde ich Ede Wymeken, to Jever hovetlinghe, myn segele hijran doen hanghen unde gehanghen Ghegeven in deme jare unses Heren dusent vierhundert vier unde seventich, up sunte Juriens dach, des hilgen mertelers.
x
| Editionen |
E. Friedländer, Ostfriesisches Urkundenbuch II (Emden 1881), nr. 931 |
