| Nummer:oub0948 | Datum:26. April 1475 | Überlieferung:Editie | Fundstelle:Ostfriesisches Urkundenbuch, II, S. 49, nr. 948 |
Testament des Lubbo Onken zu Knyphausen.
In den nahmen Gades. So alss de meinsche ist ein redelick creatur van Gade geschapen, darumme ist dat ock woll redelick, dat de mensche kenne und hebbe thoflucht tho deme ghenne alletidt, de ehm sele und liff geven heft, und sunderges ihn sinen latesten kranckheit. Dat ick Lubbe Onneken tho Knipense all betrachtet hebbe in miner kranckheit und hebbe min testament geordinert und settet mit beraden mode ihn fuller macht miner conscientien, alss ick dat allernuttest unde orberst betrachten konde tho miner sele salicheit, und hebbe vorder testamentores gekoren, den erbaren minen leven ohem, juncker Eden, unde de werdigen herrn her Tiade tho Sillenstede, her Lubbe tho Ackum minen kerckherrn und min bichtvader gewest heft, her Lubbe tho Inssmerhove [*], her Arendt tho Federwerde kerckhern, und will dat so geholden hebben unvorbroken sunder jenigerley gefehrde van minen kindern, haussfrouwe, frunden und frembden ihn wise nabeschreven, dat geseth in des mitwekens vor Philippi et Jacobi der hilligen apostell, in deme jahre na der boert Christi unsers Herrn dusent veerhundert ihn deme viff und soventichsten jahre, ihn jegenwardicheit veler guder loeffsamer lude. In dat erste, so scholen mine kinder dat erve deelen in Butyaden und ihn Stadtlande; sunder 2 juck geve ick tho Langewerden, und 2 juck tho Rodenkercken in de kercken. Item als mi hebben gegeven Tiade Enstes und Luderd Oman den heert tho Knipense, so geve ick minen sohne Iken de borch und den herdt mit ander erveguder, dat ick brukende bin, dat sy wor dat idt sy, lickende und alle ander guder bewegen und unbewegen; behalve uth dem erve und guder geve ick Sybet mines sones kindt en huserve tho Senenwerde, dat Haye Scholer bruckende ist; item Renelt sin suster hundert gulden ahn smide und an ander gude; item so geve ich juncker Eden minen ohem den groten pagen und bitte ehm, dat he minen sonen Iken und mine hausfrouwe Binlip bystandt do ahn ere und recht, alss ick bi sinen vader und freunden faken hebbe dan mit live und gude; und weret saecke, dat min soene Ike aflivich worde, dar Godt vor sij, und neue erve nalate, so schall juncker Ede hebben Knipense. Item so geve ick 30 grase landes to Ackum tho sunte Thomas altar, dar Ede Her Gaicken heft. Item tho sunte Wilhadusbuwe hundert stucke goldes. Item so geve ick en timpade span tho Oistringefelde. Item dat ander tho Senwarde. Item so geve ick dem kerckhern, de komen tho miner graft enen jewelicken einen golden Rinschen gulden und den vicarius einen Arn. [*] gulden. Item tho Ackum minen pagen als ick ehm plach tho ridende. Item tho Fedderwerde 10 Rinsche gulden in gude. Item broder Gerdt 2 Postulatsgulden tho Jehver. Item broder Hinrick 2 Post. gulden. Item broder Berendt 1 Post. gulden. Item in de kalandt tho Jever 8 Arn. [*] gulden. Item up den Sande en koe. Item tho Borden enen R. gulden. Item tho Sedick enen Rinschen gulden. Item so geve ich Bindlip all dat schmide, dat se heft, dat ick lavede eren broder seligen Alken, vor her Focken, Dodo, Sappen und Fulqua hern, ehr se tho mi quam. Item Binlip schall beholden hundert gulden Rinschgulden, dar unse beyde guder sint, und schall daraf besorgen unsen oldern seelen und unse egen selen. Item den gordell, de uth Senenwerde kercke quam, gaf selige Alke Binlip halff und ick Lubbe half. Item so geve ick Binlip den gordell, de ihn Butyaden koft wort. Item so geve ick besunderges Binlip 40 grase landes tho ehre lifftucht, dar Hinrick Wilkens up sidt. Item so neme ick dat up mine sele und leste hennefarth, dat ick van salige Resoldes gude nicht hebbe beholden, men ehn hoch span. Item so geve ick Houwa enen gulden rinck und wat min sone ehr untheten heft, dat schall er woll holden werden, na Binlippes rade. Item dat halve erve tho Jathusen gaff my grote Onneke, und dat halve iss min moderlike erve. Item dat erve, dat Peke Lubben heft, in min vaderlike erve sunder alle ansprake. Item de 20 juck landes, dar Rinst up claget, ist min vederlike gegeven und geerfte erve. Item de 2 juck, dar Hysck up claget mit unrechte, is min vaderlike erve. Item Sachs Hinricks erve, dat min vader geven was, schall bliven bi den hilligen; wess dar nicht by is, scholen de hilligen man uthmanen, und mine kinder scholen dar nicht up spreken. Item so hebbe ick dit testament ihn miner kranckheidt so vorramet, alss ick vaken hebbe gesproken mit geistlichen und werltliken in miner suntheidt und dat dat testament warhaftich und rechtferdich is unde schall wesen, so hebbe ick frundtliken angeropen und gebeden, desse erebenomeden mine testamentores, dat jegenwordige testament helpen tho betugende und tho sterckende, und in siner vuller macht tho blivende, den wi umme siner bede willen so gedaen hebben, und hebben des tho mer getuchenisse und orkunde der warheidt unse rechte ingesegel witliken hangen laten bynedden dessen testaments. Datum ut supra.
Das jegenwertige copey mit dem rechten original uff pargamen geschriebenen undt mit funff siegeln bekrefftigten testament von mir undtenbenendten offenen kay. notarien vleissich collationirt undt von wortt zu wortt gleichlauttendt befunden, uhrkunde ich mit dieser meiner eigenen handt uudt nahmensundterzeichnus.
Thomas Preuser manu propria.
Das jegenwertige copey mit dem rechten original uff pargamen geschriebenen undt mit funff siegeln bekrefftigten testament von mir undtenbenendten offenen kay. notarien vleissich collationirt undt von wortt zu wortt gleichlauttendt befunden, uhrkunde ich mit dieser meiner eigenen handt uudt nahmensundterzeichnus.
Thomas Preuser manu propria.
