| Nummer:oub0955 | Datum:Köln, 22. Juli 1475 | Überlieferung:Editie | Fundstelle:Ostfriesisches Urkundenbuch, II, S. 56, nr. 955 |
Derselbe fordert den Bischof von Münster auf, die Gräfin Theda bei der Verfolgung ihrer in der vorigen Nr. angegebenen gerechten Ansprüche zu unterstützen.
Wir Friderich van Gotzs gnaden Romischer kaiser, zu allen zeitten mherer des reichs, zu Hungeren, Dalmacien, Croacien koning, hertzog zu Osterich und zu Steir, entbietten deme erwerdigen Heinrichen, bischoff zu Munster, unsern fursten und lieben andechtigen, unser gnad und alles guedt. Erwerdiger furst, lieber andechtiger. Uns haett de edell unse liebe andechtige Teda, grefin zu Ostfresslant, von ir und irer kindere wegen furpracht, wiewoll wir weilantt grave Ulrichen von Ostfresslantt, iren hausswirt, mitt den landen van der Emese biss uff die Weser belentt und allen hoefftlingen, undertanen und zugewanten derselben lande durch unser keiserliche brieve ernstlich gepotten hetten, ire gericht und gerechticheitt, der sie sich gepraucht, furter an uns und des hilligen reichs staett van den genanten grave Ulrichen und sinen erben zu entpfaen und den darumb gewonlich geluebt und gehorsam zu thuen, als sich gepurtt, wie dan das unser keisee brieve, ine deshalben zugesantt, clerlicher ausweisen, so hetten doch dieselben heufflinck, undertanen und zugewanten der upgemelten lande solchs alles frevenlich vorachtet und die vorbestimpte ire gericht und gerechticheitt bisher entfangen mitt gewalt gepraucht, des uns und dem hilligen reich an unser obericheitt, und in und iren kinderen an sollichen iren gerechticheiden tzu merklicken schaden keme und haett uns darauff demutiglichen angeruffen und gepeten sie hirinnen gnedichlichen zu vorsien. Wan uns nun sulk ungehorsam und vorachtung unser kais. gepott van uns und des hilligen reichs underthanen zu gedulden nitt geziemett, sunder die obberurtte vorlehnung und unser kais. gepott zu hanthaben und in wesen zu halten gepurtt, darumb so haben wir denselben heufftlingen, undertanen und zugewanten der vorberurten lande durch unser kais. breve abermals ernstlich gepotten, sollich ir gericht und gerechticheitt van der ge-nanten Teda und iren kinderen zu entpfaen, als sich nach laut unser kais. lehn- und gepottbreven gepurtt, als das ine die brieffe deshalben zugesant auch clerlicher zu verstein geben, und entpfelen darauf deiner andacht van Rom. kais. machtvulnkommenheit by den pflichten, damit du uns und dem hilligen reich vorbunten bist, ob sich dieselben houfftlinck, undertanen unde zugewanten in sollichen aber ungehorsam erzeigen und dich de gemelte Teda ir und irer kinder halben darin umb hilff und bistant ersuchen wurden, das du dan von uns und des hilligen reichs wegen die itzgemelten heufftlinck, undertanen und zugewanten darob steiest [*] und bostellest, damit sie den upbestimpten unsern kais. gepotten gehorsamlich nachfolgen und sich des furder mherer nicht stehen noch wideren, und was du also mit ine vornimpst und handelest, damitt soltu [*] wider uns des hilligen reichs noch nemant anderen gevrevelt noch getaen haben, noch niemant darumb zu antworden, noch eynigerleie zu thuen pflichtich sein in kein[*] weis, und dutt auch dein andacht daran unser ernstliche meynung und sonder gefallen zusampt der billicheitt in gnaden gegen dir und deinen stifft zu erkennen. Geben in unser stadt Collen, am zwe und zwingesten tag des mants Juli, anno Domini etc. LXXo und viff, unsers keisertumbs im vier und zwintigesten.
