| Nummer:oub1035 | Datum:20. Juni 1480 | Überlieferung:Editie | Fundstelle:Ostfriesisches Urkundenbuch, II, S. 119, nr. 1035 |
Gräfin Theda bekundet die von Heinrich Smyd zu Emden von Todes wegen vorgenommene Schenkung mehrerer ihm zustehender Renten aus Emder Häusern an verschiedene Klöster zur Verbesserung ihrer Kost und zu Seelenmessen und an den St. Martinsaltar in der Emder Kirche unter Angabe der näheren Bedingungen
Wij Thede, gravynne in Oestvrieslande, enkennen unde betueghen openbair in dessen unsen openen besegelden breve, dat voir uns is ghekomen de beschedene unde voirsichtighe man Hinrick Smyd, borger in Emeden, ghesund unde volmechtich syns lychames unde aller redelicheit, unde hevet myd vryen willen, walberaedens nochterns moedes, ghelyet unde bekennet, woe dat he hebbe in Uden Meyene huse bynnen Emeden in der Norderstraete hundert Rinsche gulden, dair Udo jaerlix voir ghifft to renthe ses Rinsche gulden. Item hebbe he vifftich Rinsgulden in Haykens, Hero Onnekens soens, huse, dair he jaerlix voir ghifft to renthe dre Rinsche gulden. Item hebbe he oek vifftich Rinsgulden in junghen Ennens to Oesterhusen huse, werve unde guederen, dair Enno voir ghifft jaerlix to renthe dre Rinsgulden. Item hebbe he oek vifftich Rinsgulden in Johan Grawers huse unde guederen, dair men oek mede scholle koepen der Rinsgulden jaerliker rente. Desse vorg. stummen gheldes hevet de vorben. Hinrick tor sulven tyd unde stunde umme Gotz willen linde umme salicheit syner unde syner olderen zelen ghegeven ende bevoelen tor eer Godes in unde myd krafft desses breves erfflichen unde ewelyken sunder wedderroepend ende ane jemandes straffinghe syner frunde effte vromeden: item toen eersten vifftich Rinsgulden to Norden int oelde kloester to sunte Mariendate. Item vifftich Rinsgulden int kloester to Meerhusen. Item vifftich Rinsgulden int kloester unde convent to Ile. Item vifftich Rinsgulden int kloester to Phalleren by Emeden; unde myd den renthen de jaerlix komen van den vorscr. summen gheldes sall men jaerlix koepen to elken cloester ene tunnen herynge in ore koeken to hulpe orer kost, unde dat de broederen unde susteren der vorscr. cloestere jaerlix sollen beghencknisse holden myd myssen unde vigilien voir Hinricks zelen nae syner doet ende syner olderen zelen to byddene to ewigen tyden. Item oek ghifft de vorb. Hinrick vifftich Rinsgulden to sunte Mertens altaer in der kercken to Emeden, dair men jaerlix voir soll koepen dre Rinsgulden renthe, wair dat men kan, unde de sall hebben unde brueken prester nae prestern to den vorg. altaer umme Gotz willen vor Hinrickes zelen truwelichen to byddene. Unde weer ock dat jemant van den schuldenern desse renthe nu effte in tokomenen tyden wedder uth oren huseren unde guederen kofften, soe will Hinrick eynen man dairto schicken, de dat ghelt wedder sall keren in jaerlike renthe to den vorg. cloesteren unde altaer jaerlix komende, so draede Hinrick vorg. vormytz doede van dessen levende sy vorscheyden; sunder Hinrick vorg. beholt sych de bruekynge des vorg. gheldes unde renthen to syner eyghenen noetrofft syn levent langh unde nicht lengher, unde nympt ende hevet ghenomen dat vorg. ghelt unde renthe wedder to lene, alze recht leenguet van den vorghenompten conventen unde kloesteren unde van den altaristen sunte Mertens altaer in formen unde maneer soe men leenguedere plecht to lene to entfanghende, myd beschede, dat de convente unde altariste des gheldes effte renthen nae Hinrikes doede nummende meer en willen noch en schollen vorlenen noch voranderen effte vorgheven, sunder de sulffs eweliken beholden unde brueken soe lange de convente unde kerken staen. Vorder soe ghifft de vorg. Hinrick twyntich Rinsghe guldene eyns uth synen guderen den armen to kledinge to ghevene, unde dit altosamene sunder wedderropend, alle arghelyst unde jenigerhande indracht van jemande uthghescheyden. Hijr hebben mede an unde over ghewesen voir tueghe, de dat mede ghehoert hebben van Hinricks munde, Johannes Moerman, secretarius unde notarius, Bernd van Duthen borgermeister, Coert becker, Johan Scroeder van Noerthoerne, borgere to Emeden, unde Claes Enghelingh to Weener, dairto gheeyschet unde gebeden. Unde desses tor orkunde unde merer vasticheit hebben wy Thede gravynne vorben. umme bede willen unse secreetzegel doen hanghen an dessen breeff. Actum et datum anno Domini Mo CCCCo octuagesimo, tercia feria proxima post Viti et Modesti martyrum.
