| Nummer:oub1041 | Datum:Kopenhagen, 4. Dez. 1480 | Überlieferung:Editie | Fundstelle:Ostfriesisches Urkundenbuch, II, S. 125, nr. 1041 |
Intercessionsschreiben König Christian's I. von Dänemark an Edo Wiemken in Betreff der von ihm weggenommenen neutralen Güter der sechs Wendischen Städte und Lübecks.
Unse gunst tovoren. Duchtige leve besundere. Uns hebben de ersamen radessendebaden der soess Wendeschen stede unde radt van Lubeke dorch ere schriffte to verstande gegeven, wo dat gy tegen God unde recht unvorwart unvorschuldes dinges ere, erer borgere unde des unschuldigen copmans gudere unentsecht anholen, unde se mannigerleye wise beschedigen laten, dat uns denne nycht billich bedungket, wo deme alles begheren wy mit andechte biddende gy der Wendeschen stede borgheren unde kopluden sodane gudere als gy one genomen unde anhalet hebben laten, gutwillich weddergeven, edder na werden betalen, unde juw furder sodaner anhalinge erer borgere unde des gemenen kopmans gudere willet entholden, angesehen wy der vorgnanten stede to ere, glich unde rechte fulmechtig syn, unde so gy jennige tosprake effte gerechtigheyt to en, eren borgheren effte kopluden vormeynden to hebbende, scholen se juw den vor uns allent wes se juw im rechte plichtig synt to donde. Weret overst gy der vorgnan. stede borgheren unde kopluden sodane genomene gudere nicht weddergeven, furderer anhalinge entholden, unde en desser unser vorschryvinge uppe ere rechtes redelike erbedinge geneten wurden laten, so sint uns de vorgenanten stede also vorwant unde togedaen, dat wy se nenerleye wise vorlaten, sunderen to rechte beschutten, vordegedingen unde in eren rechtferdigen saken rath, hulpe ende bystant to donde na vorwantnisse mothen helpen beschermen, dar denne villichte mehr mysshegelicheyt unde unwillen uth entstaen wolde, juw gutwillich hijrinne to bewisende, den steden ere gudere wedder to gevende unde juw sodaner anhalinge furdermehr to entholdende, darane do gy uns gante danchligh to willen, umme juw alletyt gnedigliken gerne to erkennen, unde wes de vorgenante stede desser unser vorschryvinge hirinne moghen geneten, begheren wy juwe richtige beschreven antwarde by dessem jegenwordigen boden. Datum an unsem slote Copenhaven, ame dage Barbare virginis, anno etc. LXXXo, under unsem signete.
