| Nummer:oub1066 | Datum:19. Juni 1481 | Überlieferung:Editie | Fundstelle:Ostfriesisches Urkundenbuch, II, S. 154, nr. 1066 |
Das Cisterzienserkloster Ihlo quittirt dem Kloster Langen über 400 Rhein. Gulden, welche das Kl. Langen für das ihm vom Propste Johannes Vredewold verkaufte Gut Bohnenburg bei Groothusen noch schuldig war und welche des Propstes Sohn an Kloster Ihlo cedirt hatte.
Wij fratres Heynricus van verhenghenisse Godes abt, Theodricus prior, Johannes kelner unde die ghemeyne priesters unde conventslude to Yle, anders geheyten Scola Dei, van der heyligher orden van Cistercien, in Oestfryeslant belegen, doen witlick, kundich ende openbaer alle die gheen, die dessen brieff seyen off horen leesen openbaer bekennende in der warheyt voer allesweem in unde myt kracht desses openen bezegelden bryeve, hoe dat wij myt goeden wille unde vorberadenen moede hebben untfangen ende upghebuert vul ende all degher na unsen genoeghe ende willen van deme eersamen vorsichtigen gheestelicken heren Johan Boemel, proest te Langhermonnyken, ende syne conventslude, van der heyligher orde van Premenstreyt, vyerhondert beschedene Rinsche gulden in reden ghelde, dyen yersten pennynck myt den lesten in betalynge des vorwerckes geheyten Bonenborch, gelegen in dat kerspel van Grotehusem im Emisghelond. Welck gelt dat cloester van Langhen vorben. nocht an rechter schult schuldich was te betalen den eerwerdigen man meyster Johan Vredewolt saliger dechtenisse, proest to Emden ende kerckheere to Gronyngen, van die leste betalynge des vorwerckes Bonenborch vorben., [*] ende uns ende unse cloester to Yle vorben. gegeven is vrij unde veylich intemanen ende upteboren, daermede tho doende unde bruyken toe nutticheyt, willen unde orber onses cloesters na unsen wille van deme eerwerdigen beschedenen vorsichtigen manne Junghe, meyster Johan syn sone, doctoer in der heiliger scrift ende kerckhere to Behim (so) in Gronyngher land, um synre unde syns vaders zielen zalicheyt ewelick darvoer te bidden, unde bedancken den proest unde syne conventslude erghenomed der goeder betalynge, schelden unde geven se ende ha er nacomelyngen, boren ende ungheboren, vry, quyt, ledich unde loss tegenwordich in krafft des bryeffs van der betalynge weegen ende alle die rechte, die dar pleecht up te vollen na utwysinge der bryeven, die daerup gemaket syn: so dat wij off nyemant van unsen wegen off unse nacomelynge, boren off ongheboren, willen, schulen off mogen enygerleywijs myt enigen rechte geestlick off werlic in tocomenden tijden meer anclage off manen off ansprake doen, mer dat sal van uns stede, vast ende onverbroken werden geholden to ewigen tijden sonder alle arghelist, hulperede, intoch unde nye vonden utgesproken. Des to tuge so hebben hier tegenwordich, mede, by, an unde over geweest Johannes Ludeman, kerckhere in Emden, Jacobus prebendatus, meyster Everhardus priester unde notarius, Florijs schutemaker, Helmich tonslager, borghers bynnen Emden, als warachtige tuychslude bysonderlynge hiertoe geeyset ende gheroepen unde anders vele gueder lude. In orkonde der waerheit ende meerder tuychenisse, so hebben wy Heynricus abt vorbenomed myt vullen willen, rade unde consent onser gemeyne priesters ende conventslude onse inghezegel myt unsen abbates ingezegel witliken ende myt goeden wille gehangen heeten toe dessen breve. Int jaer uns Heren Mo CCCCo LXXXIo, up sunte Gervasii unde Prothasii dach martyrum.
