| Nummer:oub1079 | Datum:17. Sept. 1481 | Überlieferung:Editie | Fundstelle:Ostfriesisches Urkundenbuch, II, S. 166, nr. 1079 |
Bischof Heinrich von Münster etc. verleiht dem Gerald Beninga für den Fall des Todes oder der Resignation seines Vaters Ailt die Anwartschaft auf die Propstei Hisste.
Hinricus Dei gracia, episcopus Monasteriensis ac sancte Bremensis ecclesie administrator, dilecto nobis in Christo Geraldo Bennyngen salutem in Domino. Volentes tibi propter favorem, quem propter merita tua ad te gerimus, graciam facere specialem, preposituram nostram in Hynt, quam fidelis noster dilectus Aylt Bennyngen, pater tuus eiusdem prepositure prepositus, actu regit et possidet, quam cito eam per ipsius patris tui mortem seu liberam resignacionem vacare contigerit, exnunc prout extunc et extunc prout exnunc cum suis redditibus, obvencionibus, proventibus et emolumentis universis, tibi Dei et dictorum meritorum tuorum intuitu conferendam duximus et conferimus, necnon de eadem providemus ac investimus per presentes, modo subsequenti, videlicet, quod, iure dicti Aylt patris tui, quamdiu vixerit in eadem prepositura semper salvo, tu post eius mortem seu liberam resignacionem et non antea immediate sis dicte prepositure in Hynt verus rector et prepositus, salvis eciam semper nostris et successorum officialium et commissariorum nostrorum iuribus, iurisdictionibus et consuetudinibus in eadem; et quod, cum a nobis aut nostro officiali vel commissario nostri nomine requisitus fueris, sine aliqua dilatione fidelitatis et obediencie iuramentum prestes et eciam in scriptis sub appenso sigillo tuo, modo et forma consuetis, transmittas, bona videlicet dicte prepositure conservando, alienata iuxta tuum posse et nosse recuperando, nobis et ipsis in licitis et honestis obedienciam debitam prestando, continuam residenciam in eadem faciendo etc. prout in forma consueta; alioquin dieta nostra collatio sive provisio tibi de dicta prepositura presentibus facta nullius sit roboris aut momenti. Mandamus igitur universis et singulis utriusque sexus hominibus tam ecclesiasticis, quam secularibus, quacunque eciam prefulgeant dignitate et presertim pensionum et reddituum colonis et nostris subditis dicte prepositure in Hynt sub excommunicacionis et mille florenorum Renensium nobis pro medietate et parti lese equepartim solvendorum penis, ut post mortem vel liberam resignacionem dicti Aylt, patris tui, te in eins verum et legittimum rectorem et prepositum admittant, recipiant, teneant et habeant, et quantum in eis fuerit de fructibus, redditibus, proventibus et obvencionibus eiusdem prepositure respondeant et ab aliis ad quos pertinet seu pertinuerit responderi procurent, contrarium vero facientes, sex tamen dierum canonica monicione premissa, excommunicacione summa presentibus innodamus et super pena pecuniaria arciori modo quo poterimus contra eosdem procedemus. In quorum omnium et singulorum fidem et testimonium premissorum sigillum nostrum presentibus iussimus appendi. Datum anno Domini millesimo quadringentesimo octuagesimo primo, ipso die Lamberti episcopi et martiris.
