| Nummer:oub1151 | Datum:14. Juni 1485 | Überlieferung:Editie | Fundstelle:Ostfriesisches Urkundenbuch, II, S. 222, nr. 1151 |
Der Bürgermeister Hompo Hayena zu Emden bekundet einen mit der Komthurei Abbingweer eingegangenen Gütertausch.
Ick Hompe Hayena, borghermester in Emeden, enkenne unde betueghe overmits dyssen openen bezeghelden breff, dat ick myt vrygen wyllen unde wolberadenes modes voir my unde al mynen erven, gheboren ende ungheboren, hebbe ghebutet unde ghewesselt tho eynen steden vasten ewijghen unvorbroken butynghe unde weslinghe myt den erbaren heren, her Abbe, commenduer tho Abbinchwer, ende conventesluden, susteren unde broderen, in zodaner manneer, dat ick Hompe voirben. den vorscr. convent overgheve unde overdraghe voir my unde alle myne erven int ewych Ubbingheweere myt den Heller, gheheten Ubbingha Fletesham, dat ick in voirtyden hebbe ghekofft van mynen oem Heren Hompen unde Tetten syn moder, nae uthwysinghe oerer bezegelden breff dairup ghegeven, dat Heren erben. angheervet ys van synen olderen. Dair my wedder to myner vuller noeghe in voir ghegeven int ewych derteyn grazen medlandes, beleghen in Dammuser hamerke, de seven grazen gheheten Tyadsna land, unde derdehalff gras licht dairan by de westerende, ende verdehalff gras, gheheten lutke Merne. Dysses voirscr. butynghe scal ick Hompe unde wyl voir my ende alle myne erven int ewych den vorscr. convente vryg warende wezen voir alle ansprake, als dat de vorscr. conventesluden moghen dyth vorb. land brueken, voirwesselen, voirhuren, woe[*] eme dat nutte unde orber is ane jemandes weddersprekent ane alle arghelist, unde voirlathe alle eghendoem, de ick Hompe vorscr. hat hebbe up dyth voirscr. land. Hyr by unde an sint aver ghewezen de erbaren unde voirsichtigen mannen Nome Meckena, Ghert van Gelderen, boirghermeistere in Emeden. In orkunde der waerheyt, so heb ick Hompe erbenomed ghebeden fruntliken den ersamen heren, her Jacob Klinckart, to onser leven Frowen altaer prebendaten bynnen Emeden, umme dessen breff to bezegelen, unde ick Jacobus voirben., umme bede wyllen Hompen, hebbe myn ingeseghel wythliken ghehanghen an dyssen apenen bezeghelden breff. Int jaer uns Heren dusent veerhundert vyff unt tachtentich, up sunte Viti avent.
