| Nummer:oub1308 | Datum:7. März 1492 | Überlieferung:Editie | Fundstelle:Ostfriesisches Urkundenbuch, II, S. 345, nr. 1308 |
Der Häuptling Ubbo Tydenna zu Upleward verkauft dem Nonnenkloster Dyckhusen mehrere Stücke Land unter Vorbehalt des Wiederkauf, binnen zwanzig Jahren.
Ick Ubbo Tydenna, Ihn Plewerden hoevetlyngh, enkenne apenbaer in unde overmids kraft ende macht dessen openen bezeghelden breves voer allen erwerdighen, eerbaren, ersamen luden, de dessen breef zeen, hoeren of lezen, dat ick hebbe verkoft stedes, vastes erffkoepes der gheestlicker suster Tatken, nu ter tijt priorissen, tho nutticheit, orbarheit ende profijth des conventes Dyckhusen, ses grase landes an groete Bette 9 grasen, daer dat conventh in is hebbende vyf verdendeel ende druddehalff gras; noch veer grase unde een trymel[*] gras an der westerzijdt des cruces tusschen Dyckhusen ende Vyschwert beleghen, voer een noemtlijck ende bescheydelycke summe gheldes, als hundert enkele olde Rynsch gulden, welcker summe unde gulden wy Ubben voerghenompth van der erberen priorissen degher al, de laetste myt den eersten, tot myner noeghe ys betaelet, waerumme soe gheve ich Ubbo vorbenoemth dyt erve voerscreven over, vrygh, ledich ende qwijth deme convente tho bruken sunder myn of yemandes wedersegghen tho ewighen tyden, doch myt vorderen bescheyde ende voerwoerden ick Ubbo vorben. dem convente voerscr. mach wederumme gheven bynnen ener zekeren tijt overmits my sulffs ofte mynen erven dessen hundert golden (so) bovenghescreven, als twyntich yaeren na datum desses breves, ende dat conventh vorscr. my den wederumme gheve ende levere ofte den mynen de veelheit ende zekeren tal desser erve, als teyn graze ende een trymel gras in de selffte Vischwerder hammerick tusschen Vischwerden, Maers, Made, Koldeweer ende Dycko Path. Hijr synnen by, an unde over ghewesen alsoe rechte tugheslude de erwerdighe mester Thyardt Hayena toe Pylsum ende Addo Elenna tho Manslacht, kerckheren, her Nonno, in Plewerden vicarius, ende Tyarck Egghenna daersulfs. In vorder oerkunde der waerheit hebbe ick Ubbo vorben. myn inghesegel wytlycken doen hangen ant spacium desses breves, up dem hilligen dage Thome de Aquino, int yaer des Heren als men schreef veerteynhundert twe ende neghentich.
