| Nummer:oub1310 | Datum:17. März 1492 | Überlieferung:Editie | Fundstelle:Ostfriesisches Urkundenbuch, II, S. 346, nr. 1310 |
Agghe Tyaertsen und dessen Frau Dedde tauschen mit dem Propst und Konvent des Klosters Langen 20 Grase Landes gegen andere Grundstücke aus.
Wy Agghe Tyaertsen ende Dedde, myn echte huysvrou, doen witlick, kundich unde openbaer allen denghenen, die dessen brief sien ofte horen lesen, dat wy mit unsen vrien wille ende voerberadens sinnes heben ghewisselt to enen vasten ewighen wissel in kraft des besegelden breves mitten eerbaren man, here Johan van Boemel, proest to Langhen, ende mit syne ghemeine convent Langhen, also dat die proest voerscr. offte syne convent van my Agghe unde Dedde eergenant heeft ontfangen twentich grase landes, ligghende aen vier stucken, dat yerste stuc is ses grase, liggende in eenre vennen van neghen grase, ende is gheheiten die Werer, int west van Walseten in Waechwerder hamrick tegen den nyen wech, ende Hayen Frellef is opt norden aldernaest belandt. Dat ander stuc syn twe grasen ende ligghen in eenre vennen van vijftien grasen, gheheiten die Hoge ven, in Wachwerder hamrick, ende die seven grasen horen to Yppen kynt to Walseten, ende die ses grase horen den kerkher to Walzeten; dat derde stuck syn acht grase, ende ligghen in Peusemer hamrick an Peusemer maerwech, [*] ende opt norden van dessen vennen heeft die joncker to Peusum ses grasen, ende Ulbet to Soerhusen heeft daer acht grase ligghen upt suyden. Dat vierde stuc syn vier grase, gheheiten die steen ven, beleghen in Peusemer hamrick, in der hornnen van Peusemer maer. Ende voer dit eergenante lant heben wy Agghe Tyaertsen unde Dedde, myn echte huysvrou, wederom ontfangen van den proest ende syne convent veelgenant een ven van vertien grasen, gheheiten in die Jucher, in Wivelsemer hamrick, ghelegen to Geerdeswer an den kerckhoff, ende daerboven heben wy Agghe unde Dedde voersereven ontfangen van den proest ofte convent een summe gheldes, als sestien golden Rynsche gulden, unsen wille ende nutticheit daermede tho done; ende dat convent sal ende mach vrij ende veylich ewelick bruken desse voerscreven twentich grase na haren wil ende nutticheit, ende were dat saeck, dat yemant op dit vorscreven erve in toecomenden tiiden anclaghe dede van dessen wissels weghe, so willen wy Agghe unde Dedde vorscr. ende unse erven, boren unde ongheboren, den convent vrii, quijt ende scadeloes holden van allen ansprake geestelick ofte weerlikes rechtes sonder arghelist. Hier heben mede, an ende over ghewesen als heer Rycken, priester to Lerelt, ende Remet Hobben to Walzeten voer tugen, daerto gheeyschet unde ghebeden. Ende om meerder vastnisse der waerheit, so heben wy Agghe unde Dedde voerscreven ghebeden den eerbaren meyster Dyrck Valkene, kerchere to Hlerlt, dessen brief over uns tho bezegelen, ende ic meyster Dirck Valkene, kerckhere to Hlerlt vorscreven, dat gherne heb ghedaen om Agghe unde Dedde vorscreven vrientliker bede willen. Int jaer ons Heeren dusent vierhundert twe unde negentich, up sunte Geertruden dach joufrouwe.
