| Nummer:oub1339 | Datum:11. Dez. 1492 | Überlieferung:Editie | Fundstelle:Ostfriesisches Urkundenbuch, II, S. 372, nr. 1339 |
Vertrag zwischen dem Bischof von Münster, dem Grafen Mauritz von Spiegelberg, dem Edlen Herrn von Diepholz, den Häuptlingen Hero von Dornum und Edo Wiemken einerseits und den Grafen Edzard und Uko von Ostfriesland andererseits, über die Beendigung ihrer Fehde, die Behandlung der Gefangenen u. a. m., und Verabredung einer neuen Tagfahrt zu Aschendorf.
To wettene, dat up dach datum desser nottulen tusschen den eirwerdigen in Gode vader hogebornen fursten unde heren, heren Hinrick, bisscop to Munster unde administrator der hilligen kercken to Bremen, unsen gnedigen leven heren, vor syck, zyne lande, lude, undersaten, holperen, holpersholpere, anhangeren, togedaenen unde bewanten, als besunders der edelen junckeren Mauricius, greven to Spegelborch, Roleff, edelheren to Deipholte, nnde ock heren Hero van Dornum ritter, to Esensse etc., unde Eeden Wymken to Yever, hovetlingen, an eyne, unde den edelen junekeren Edtzardt unde Uken gebroderen, greven in Oestvreschlandt, eren landen, luden, undersaten, holperen, holpersholperen, bewanten, anhengeren unde togedaenen an der anderen zyden, der twyst, gebrecken unde unwillen wegene, tusschen en entstanden unde wesende, unde somyge unses gnedigen hexen van Munster unde Bremen undersaten vyande umme geworden zyn der vorgerorden greven, unde daruth zo vorder to antaste angreppe is gelopen unde gekomen, uppen dage darumme an den Hempoele avermytz de wendiges, erberen unde ersamen domdecken unde capittell der kercken, borgermesteren unde raede der stadt Munster verarbeydet unde vorramet dorch de ere darto geschycket, myt todayt des werdigen heren Didericks van Ryswyck, doctoren, pravestes to Cleve unde Husum gehandelt, besproken unde gededinget in eyn gutlick bestant uppe dach datum desser nottulen angaen, duren unde waren sall beth ton sondage, achteden dach des hilligen Pinxterdages nestvortvolgende, densulfften sundach all uth, myt sulcken bescheyde unde vorwarden: das alle vangenen in derselfften veede gegreppen unde noch in hachten unde beholde syn, so lange uppe guden genochsamen geloven vor ze gestalt sall werden, dach sollen hebben, unde myt allen unbetaelden gelde vor vangene uthgekofft unde geborget syn uppe geloven an de tosage darvor gescheen, sall ock zo lange bestaende blyven; doch myt sulcken bescheyde, dat de lovers unde borgen darvor gelikewall sollen verplichtet unde verbunden wesen myt erer deshalven loffte unde tosage. Ingeliken ock Spykerman, de in unsen gnedigen heren vencknysse to Voerde zyth, umme dat he den tollen to Stade voreden sall hebn och de vaget tor Vredeborch tho Delmenhorst in vencknisse is, unde vyff Emeslender, de in vencknysse der greven vurscr. syn, umme dat ze ock nynen tollen sollen gegeven hebn, daert syck behoerde, uppe geloven sende borchtall sollen bedaget werden, unde voer alle vangene sollen werden vernoget vanckguldene unde sluetguldene, unde de gefangene alle sollen ock weder inholden, alst bestant uthgeyt, ten were bynnen den bestande wes anders worde gefunden, offte de borgen unde lovers sollen darvor wesen verplichtet na tosage unde loffte, als van on de syn gescheen, unde ock sall all brantschatten- unde dincktaelsgelt noch unbetaelt is so zunder uthforderinge unde manynge staen, unde bynnen den bestande sollen ytlicks undersaten blyven uppe grunde des, dar de under besetten syn, ten were welcken deshalven geleyde gegeven werde uppe des anderen grunt to komene, sulcks mede bescheyden is, te mogen gescheen; unde hyrup is mode durch capittels unde stades vurscr. geschyckede, rnyt todayt des benompten pravestes to Cleve unde Husum, tusschen beyden zyden eyn dach weder verramet unde bestemmet bynnen Asschendorppe geholden to werdene upn nestkomene donrdach na deme sondage Quasimodogeniti schyrstvolgende, [*] to acht uren des morgens, vor frunde vame vurscr. capitell unde stade darto werden deputeert, unde dar dan wesen sollen in medejegenwordicheyt des vurscr. pravestes, so veher he dar dan ock bykomen kan, unde offt he des nycht konde doen, sall gelikewall de dach vortganck hebn in mathen allet zo vorgerort, unde offt capittelle unde stade de gesatte dach wes ungelegen were offt wurde, is mede bevorwardet, ze den dar eyne redelyke tyt by veyrtheyn dagen mogen vorkortten oder verlengen, unde dat ze ock dan tytligen genoch tovoren zo by sodaner gerorter tyt sulcken an beyden zyden sollen vorwitliken umme desulfften, dar dan deshalven to deputeert unde geschyckt werden, dan deshalven de saken unde gebreke tusschen beyden parten unde der beyder zyden undersaten, wo de eyn gestalt hebben, unde weme unde waerhen de andreppende syn, vorder to undernemen, unde darover to wesene unde handelende, de in gutlicheyt offte na guden bescheyde unde redden darna de gestalt zyn, geflegen unde hengelacht mochten werden. Unde deses in orkunde unde tuchnisse synt hyrup gemaket twe nottulen gelicks inneholdes uth eyn anderen durch de letteren A B C unde D gesneden, der eyn vor unsen gnedigen leven heren van Munster unde Bremen beholden, unde de ander voer de ergenanten greven overgegeven is. Gededinget unde gegeven ime jare unses Heren dusent veerhundert twe unde negentich, des dinxedages na unser leven Frouwen conceptionis dage.
