| Nummer:oub1374 | Datum:13. Nov. 1493 | Überlieferung:Editie | Fundstelle:Ostfriesisches Urkundenbuch, II, S. 398, nr. 1374 |
Dodo Tyadensen und seine Frau Tyabbe zu Logum tauschen mit dem Kloster Langen 28 genau bezeichnete Grase Landes aus.
Wytlick, kundich ende openbaer syd alle denghenen, de dessen brief sien ofte hoeren lesen, dat ic Doden Tyadensen to Loghen ende Tyabben, myn echte huysvrou, dat wy mit vrien willen ende voerberadens sinnes hebben ghewisselt ende ghebutet to enen steden, vasten, ewigen wissel in kraft des brieves mit de eerbaren gheesteliken here, heer Johan van Boemel, proest to Langen, ende mit synen ghemeynen convent ende senioren to Langhen, also dat ic Dode ende Tyabben, myn huysvrou eergenant, hebben ghedaen ende ghegeven van onsen lande den voerscr. proest ofte syne convent acht ende twentich grase landes ende een half gras, ghelegen aen vyf stucken: dat yerste stuck syn ses grase, ghelegen in Woltzeter hamrick, liggende int oest van den woltwech, daer Uwe, meyster Eben broeder to Eemden, heeft teghen ses grase, die tegen malcander weren in derselven vennen, welker voerscr. ses grase heb ic Dode ghecoft hier voermaels van Aelrick Yeleffna ende syn echte huysvrou Mensen Dat ander stuck is vierdehalf gras, gheleghen in Wacheder hamrick in Haro Unckens venne to Pelsum, beleghen in dat west van Woltzeten, welke voerscr. vierdehalf gras heeft Dode gecoft hier voermaels van Aelrick Yeleffna ende syn echte huysvrou Menen. Dat derde stuck in vyf grasen, gheheiten Cruyselant, ligghende in Woltzeter hamriek int west van den woltwech, daer dat cloester Langen aldernaest lecht int zuden mit achtehalf gras, welke lant heeft Dode eergenant gecoft van den eerbaren man Hatet Metsena, hovetling to Middelstewerum. Dat vierde stuck syn seven grase, ghelegen in Hamswerummer hamrick in Boeltzena horne, ende is strekende mitten westen an dat olde maer, ende het lecht mitter nordersyden an Udo Houwena ses grase, gheheiten Foken Haetzena seven grase, welke voerscr. lant heb ic Dode veelgenant gecoft van Yppen Fockena to Plewert. Dat vyfte stuck syn seven grase venlandes, gelegen in Comper hamrick bi den olden wech, liggende mitter westerzijde aen Homme ses grase, mitter oesterzijde an den clenen wech, gheheiten Monikenmede weykele, ende syn gheheiten Foka Hatetzna seven grase, welker voerscr. seven grase heb ic Dode gecoft in voertiden van Yppo Fockena ende Sybelt syn swager, inwoners to Plewert; ende voer dit voergenante lant hebben wy Dode ende Tyabben, myn echte huysvrou eergenant, wederom ontfangen van den proest ofte syne convent to Langhen achtentwentich grase landes, ghelegen altesamen in Wyvelsummer hamric aen vyf stucken. Dat yerste stuck syn twelf grase, liggende int suden van Wyvelsum; dat ander stuck syn elf grase, geheiten Apekeven, liggende int zuidtwest van Wyvelsum. Dat derde stuck syn twe grase, gheheiten de Wynselken, liggende int suden van Wivelsum. Dat vierde stuck syn twe grase, gheheiten de Kelck, ligghende bi den borchwech int nordwest van Wyvelsum, welke twe grase syn gecoft van den hilligen to Hlerlt. Dat vyfte stuc is een gras, liggende bi dat olde Wivelsummer maer. Dit voergenante lant sal ende mach een yegelick vry ende eweliek bruken na synen wil ende nutticheit, ende mit voerwarden, so wil ic Dode ende Tyabben, myn huysvrou bovengenant, den proest ofte dat convent voerscr. des wissels goede waerres wesen voer allen rechten ten ewigen tijden op onsen kost sonder alle arghelist. Tughe syn hierto gheeyschet ende ghebeden, als Herman to Lendt ende Gheerit Doncker, inwoners to Loghen. Ende om meerder vestenisse der waerheit, so hebbe ic Dode ende Tyabbe, myn echte huysvrou, ghebeden de eersame mannen, als heer Focko, kerckheer tho Gheerdsweer, ende heer Foelrick, kerckheer to Loghen, dessen brief over ons to bezegelen, ende wy heer Focken, kerckhere to Gerdswere, ende heer Foelrick, kerckheer to Logen voergenant, dat gheerne hebben ghedaen om Dode ende Tyabben, syn huysvrou, vrientliker beden wille. Int jaer ons Heren dusent vierhondert ende drie ende neghentieh, up sunte Brictius dach confessoris.
