| Nummer:oub1436 | Datum:14. April 1495 | Überlieferung:Editie | Fundstelle:Ostfriesisches Urkundenbuch, II, S. 449, nr. 1436 |
Ered zu Suurhusen verkauft dem Bolard von Jemgum, Bürger zu Emden, 3 Grase Meedlandes.
Ick Ered, inwoner to Zuderhusen, bekenne unde betueghe in unde overmyds dessen apenen beseghelden breve voir alsweme, dat ich vrijes unde walberadens moedes hebbe vorkofft unde vorkope in crafft unde macht desses breves steedes, vastes, ewigen erffcopes, deme ersamen manne Bolards van Jemmyngen, borger in Emeden, dree grase meedlandes in Zuderhuser hammerick, in Eedztyuch beleghen, daer desse vorben. Bolards upt zuden hefft bij ligghen veer deymeth, voir ene summe gheldes, welkeer my de vorscreven Bolards vull unde all degher hefft wal betaelt des lesten pennyng mytten eersten, unde dancke em zijner betalinghe hoechlijken; waerumme schall unde wyll ich Ered vorben. unde mijne erven unde anervent, boren unde ungheboren, deme vorben. Bolards, Elzeken, zijner echten huessfrowen, unode eren rechten erven in ewych alzodane dree grase landes vorberoert vrijg unde qwijt, ledych unde loes, waren vor alle ansprake yn allen rechte, woeneer unde to wat steede des to doende were yn jenyghen rechte, zunder alle erghe lyste. Hijr hebben by, an unde over wezen de beschedenen manne Focke Ubbena unde Hinric, werdeyn, borgers in Emeden, unde Egghe Freedrickzena to Zuderhusen, hijrtoe ropen unde beeden. In oerkunde der waerheyt hebbe ich Ered vorscreven beeden den ersamen mann heren Johann Voerman, in der kercken Emeden altaristen, umme zijn inghesegel, dat he dorch mijner vrentlyker beede wyllen hefft wyllichlyken doen hangen to dyssen breve. Int jaer unses Heren doe me screeff dusent veerhundert vijff undetneghentich, upp de dach Tiburcii et Valeriani martyrum.[*]
