| Nummer:oub1504 | Datum:14. Okt. 1496 | Überlieferung:Editie | Fundstelle:Ostfriesisches Urkundenbuch, II, S. 512, nr. 1504 |
Gerichtsverhandlung und Urtheilsspruch in einem Prozesse zwischen Alrich zu Cirkwerum und dem Emder Bürger Edzard, welcher ihm von Alrich verpfändete 'Lappen' verkauft hat.
Anno etc. XCVIo, die Calixti pape, do ys vor borghemestern unde raetmannen int gherichte ghekomen Aelrick to Syrckwerum unde aldaer klagende, war he Edzart, borger in Emden, hebbe to een underpant ghezat een lappe[*] na der Vreschen wyse, als Edzart em wal tostonde, vor 6 Arensgulden ende 4 krumstert. Daer Edzart up antworde, hee hadde den lappen Alrick upboden, unde van heeten doen des vageden zaligen Haren heft he zee verkoft; daer Alrick wedder up antworde, dat Edzart by den vaghet ys west unde heft to em ghesecht aldus: Haro, du steyst my wal to, dat du my hefst oerlef gheven, dat ick de lappen moghe verkopen. Daer de vaget up antworde Dat leechstu my over, als du my vaken daen hevest. So hebben de borghemester unde raet ghefunden, dat Aelrick solde Dericus den schriver brynghen, unde wolden Dericus woerde horen; alzo dat Dericus ys ghekomen vor borghemestern unde raet, aldaer tugende, dat Edzart den vaget vraget heft unde ghesecht: Hare, du steyst yd my wal, dat du my oerleff gheven heft, dat ich de lappen moge verkopen. Daer de vaget up antworde. Dat luchstu my over, als du vaken daen hefft. Daerto heft Edzart vorscr. noch vor uns int gherichte ghebracht juncker Uden to Petkum, welke do der tyt knecht to Emden up der borch was, unde Udo dosulfs vor uns tugede, dat de vaget to Edzart ghezecht hadde, dat he Aelrick de pande solde upboeden, men he en heft id nicht horet, dat de vaget em gheorleft heft to verkopen. Item noch heft Edzart een zedel vor uns ghebracht, woe Klaus Goltsmyt em de lappen heb afghekoft, dat Claus wal tostoende, unde Edzart hadde ghezecht to Klaus, dat de vaghet em oerleff hebbe gheven, daer Claus wol stoende, dat he yd van den vaghet sulvest nicht hoert heft ofte oeck van synen boeden, men Edzert hebbe to Claus secht, dat de vaget em hebbe oerlef gheven. So hebben wy borghemesteren unde raet vor recht ghesecht na klaeghe unde antwort: dat Alrick sal Edzart betaten de 8 Arensgulden unde 4 krumstert in achte daghen, unde Edzart zal Aelrick wedder leveren syne lappen, alzo goet unde quaet, als he de entfangen heft bynnen achte dagen, een itlick by pene van 5 golden gulden.
