Der Bauer Here Udena zu Ackens verkauft dem Emder Bürger Bolard von Jemgum 6 1/2 Grase Landes, deren Lage und Preis genau bestimmt werden, und verspricht Gewährleistung.

Ick Here Udena, buerman to Ackenss, bekenne yn dessen apenen beseghelden breve voir alsweme, dat ick myt guden vrijgen wyllen, myt guden vorbedachten nochteren unde walberaden moede, hebbe vorkofft unde vorkope steedes vastes ewygen erffcoepes vor mij unde vor alle mijne erven unde anervent yn cracht desses breves deme beschedene manne Bolarden van Jemmyngen, borger in Emeden, zovendehalff grase landes, daer de dree grase zynt beleghen yn Eedlummer hammerick yn eynen stucke van sess grazen, unde de anderen dree grase horen Teet Haren, daer mester Tyart bij ys belandet myt 7 grasen; unde de anderen veerdehalff grase beleghen yn Manslachter nije hammerick, ghenomet Aynerscomp, daer de abt to Norden ys bij belandet myt een stucke landes, ghenomet Hyssen komer. Desse zovendehalff grase landen zijnt yn enen kope vorkofft, elk gras landes vor vijff golden Rynsen gulden myn enen Rynsen gulden over den koep, welkeer summe van ghelde mij de vorbenomed Bolarde vull ende all wall hefft betalt, den lesten pennyng mytten eersten to mijnen wyllen, des ick em dancke; waerumme schall unde wyll yck Heere unde mijne erven unde anervent ynt ewich deme vorbenomeden Bolarde, Elzeken zijner echten hussfrouwen, unde eren rechten erven ynt ewich alzo de vorbenomed zevendehalff grase landes vrijg unde qwijt, ledich unde loes waren vor alle ansprake yn alle rechte zunder bedroch. Hijr hebben bij, an unde over wezen vor tughe, ropen unde beeden, de beschedene manne Hinrick Kremer unde Gheert Kannengheter, borgers yn Emeden, unde Emme yn der Greed. In oerkunde der waerheyt hebbe ick Heere Udena vorbenomed beeden den ersamen man heren Johanne Voirman, prebendaeten yn Emede, umme zijn eghen inghesegel, dat he wyllichlyken umme mijner vrentlyker beede wyllen hefft doen hangen to dessen breve. Anno Domini M^o CCCC^o zoven undetneghentich, up den dach Gordiani et Epymachi martyrum.

x

x

Bestand	Ostfriesisches Urkundenbuch, II
Fol. Nr.	S. 538
Nr	1540
Olim	Orig. Perg. im Archive der Gesellschaft für bild. Kunst etc. zu Emden.
Jahr	1497
Datumcode	EpiGor

x

x

Kommentar	Das Siegel zeigt einen von einer aus dem linken Schildesrand wachsenden Hand dargereichten Kelch. Umschrift: S. domini Johannis Voerman.

x

Material	papier

x

Editionen	E. Friedländer, Ostfriesisches Urkundenbuch II (Emden 1881), nr. 1540