Pfarrer Boyo Meyena bekundet den Verkauf von 5 Grasen Landes in Woquarder Hammrich seitens des Häuptlings Keno zu Groothusen an Bolard von Jemgum, Bürger zu Emden.
Ick mester Boyo Meyena, decretorum doctor, kercher to Grote Phalteren (!) unde vicarius perpetuus der kercken Emeden, bekenne unde betuge apembar vermits dussem mynem apenen bezegelden breve vor alsweme, wo vor my is gekomen de erbere Keno, hofftling tho Grotehusen, unde bekande, he mit guden vrien willen vorbedachten modes hedde vercofft unde noch jegenwordich in macht s breffs vercoffte erfflick und ewelick vor sick und sine erven vijff graze landes in Wachwerter hamrick, belegen bij Wachwestere Esckwey, middes by Dijckhusumrelandt, deme ersamen Bolardo van Jemgum, borger in Emeden, Elzeken siner eliker huysfrouwen unde orer twyer rechten ervent, vor eyne tsumme van gelde, dewelcke Keno vurscr. bekande ome de erste penninck mit deme latesten van Bolardo unde Elzeken vurscr. to willen unde vuller noge woll entrichtet unde betalet were, des he on bedanckede, unde lavede on unde oren rechten erven vor sick unde sine erven dusses vurscreven landen gude vaste warschup to done vor alle ansprake geistlikes offte wartlikes gerichtes, wanneer unde wo vaken on sulcks van noden to don mochte werden sunder all argelist. Tugeslude hijrto geropen sint gewest de beschedene Gherdt Goltscmit unde Johann Dewern, borgers in Emeden. In orkunde der warheit so heb ick meister Boyo, doctor ergenant, myn ingesegel durch Kenen vurscreven bede willen beneden an dussen breff gehangen. Datum anno Domini Mo CCCCo XCVIIo, in octava assumptionis Virginis intemerate.
x
| Editionen |
E. Friedländer, Ostfriesisches Urkundenbuch II (Emden 1881), nr. 1562 |
