| Nummer:oub1572 | Datum:22. Okt. 1497 | Überlieferung:Editie | Fundstelle:Ostfriesisches Urkundenbuch, II, S. 567, nr. 1572 |
Die Grafen von Ostfriesland erklären die Münsterschen Interimsschuldscheine für die dem vorigen Bischof Heinrich und dem Kapitel geliehenen 10000 Rheinischen Gulden nach erfolgter Abzahlung des Ganzen für hinfällig.
Wy Edtzart unde Uke, gebrodere, greven to Oestfreslant, doen kont unde bekennen vor uns, unse erven unde anerven, so als twist unde irronge is gewesen tuschen den erwerdigen in Gode vader heren Hinrick, biscop to Munster milder gedacht, zynen werdigen capittel unde uns, dat wy den vurg. heren unde capittelle gutlyken geleent hebben teyndusend Rinsche gulden, dar wy dan mer dan eyne quytancie up heben entfangen; so bekennen wy, dat alle quytancien der vurg. summen van den teyndusend gulden unde alle andere quytancien myn offte mer vermogen, sollen syn unde synt in macht dusses breves crachtloess, machtloess, gelick ze nue gegeven en weren, der wy offte unse erven, ock nergen to bruken en sollen noch en willen zunder argelist, dan alleyne to teyndusend golden, de wy den upgenanten heren biscope unde capittel vurg. gutlyken betalt heben na lude der scheydesbreve; unde heben dusses in oyrkunde der warheyt unse segell vor uns, unsen broder Ucken, erven unde anerven, an dussen breff doen hangen. Datum anno Domini etc. XCVIIo, am sondage na undecim milium virginum.
