| Nummer:oub1612 | Datum:8. Nov. 1498 | Überlieferung:Editie | Fundstelle:Ostfriesisches Urkundenbuch, II, S. 595, nr. 1612 |
Der Pfarrer und die Kirchenvorsteher zu Uttum bekunden einen Gütertausch zwischen ihnen und dem Häuptling Ubbo Tydena zu Upleward.
Ic Henricus van Bra, kercheer to Uttum, Focke Ubben ende Folkert Poppen, hillighemans daersulfs, kennen unde tughen in dessen apenen beseghelden breve, dat wy hebben ghewesselt unde in craft dessen breves teghenwoerdich wisselen in een stedighe ewighe erfwesselinghe mitten duchtighen bescheydenen Ubbe Tydena, to Plewert hoeftlinck, onser hillighen neghen grase landen myn eyn sestendeel, beleghen an drie stuckere, als vierdehalff gras in Hoechwerum, drie grase Abba comper, ende derdehalff gras myn eyn sestendeel ghehieten Ulelant in Camper hammerke, voer syne twye vier grase in Estike, by syne achtehalff grase beleghen, wall tot onser beyder ghenoeghe dat ene gras om dat ander ghewesselt. Waeromme wy ende onse nakomelinghe willen ende sullen dat voerscr. lant den vorghenoemden Ubbe vry ende onbecommert tostaen ende warende wesen voer alle ansprake in gheestliken ofte werliken rechten, woe vake ofte waer des to done weer: also dat hy dat mach ghebruyken, besitten, verwisselen ofte vercopen ende all synen wille daermede doen ten ewighen tyden sonder arghelist, hulprede ofte nye vunde. Hiir heben mede, by, an ende aver ghewesen als tuychsluyde daerto gebeden die eersame gheestelike frater Arnoldus, prior in Sylo, Wyart Harena, to Uttum ende to Oldersum hoeftlinek, Benne, muyrmeyster to Plewert, ende meer goeder mans ghenoech. In eyn vorder tuychnisse der waerheyt heb ick Henricus, kercheer vorg., mynen seghell beneden an desen breeff doen hanghen. Anno Domini millesimo quadringentesimo nonagesimo octavo, ipso die quatuor coronatorum martyrum.
