Hauptseite

Nummer:oub1629

Datum:28. Juni 1499

Überlieferung:Editie

Fundstelle:Ostfriesisches Urkundenbuch, II, S. 609, nr. 1629

Regest

Bischof Konrad von Münster u. s. w. verspricht, nachdem sich Ritter Hero von Dornum und Häuptling Edo Wiemken dem Stift Münster als Unterthanen verpflichtet und ihre Burgen zu offenen Häusern gemacht, auch den Huldigungseid geschworen haben, seinerseits den beiden Genannten Schutz und Unterstützung. Hero und Edo wiederholen ihr Gelöbniss.

Wij Conrait, van Godes genaden bisscop to Munster unde administrator der kercken to Osenbrugge, doen kundt, als sick de erberen Hero van Dornum ritter, to Esense, Stedorpe unde Witmunde, unde Ede Wymeken, to Jhever, hovetlinge, vor sick, ere ervent unde nakomelinge nu vortmer to ewigen tijden und er uns unde unse nakomelinge to behoiff des guden heren sunte Pauwels unde unses stichtz Munster myt eren landen, luden unde undersaten gegeven unde gedaen heben, sick to holden gelijck anderen unses stichtz Munster vurg. edelluden unde ritterschap unde ok mede ere borge unde huse Esense, Stedorpe, Witmunde unde Jhever vorg. to nuden unde noeden to openen husen gegeven myt sodaner plicht unde rechticheyt, zo men sulcks unde darmede in gelijken valle to holdene plecht, unde darup ock gewontlike huldinge unde eede gedaen, dat ze den guden heren sunte Pauwel, uns unde unsen nakomelingen vorg. getruwe undersaten zyn sollen, in mathen zo de edele unse leve neve, raet unde getruwe, Johan, greve to Oldenborch, gedaen hefft, so bekennen wy vor uns unde unse nakomelinge vurscr., dat wij dar entegen de ergenanten hovetlinge Hero unde Eden, unde ere ervent gelijck anderen unser edelluden, ritterschap unde undersaten, dar wy erer to eren unde to rechte mechtich zin, verbidden unde verdedingen willen, dat wij also vor uns unde unse nakomelinge vurg. by unser vurstliken eren loven stede, vast unde unverbroken to holdene, unde heben des in oirkunde unse segel vor uns unde unse nakomelinge vurscr. an dessen breff doen hangen; unde want dit myt unser domdeckens unde capittels der kercken to Munster wetten unde willen gescheen ys, zo heben wy darumme unses capittels segell by des erwerdigen fursten unses genedigen leven heren vurscr. segell an dessen breff gehangen. Ock bekennen wij Hero unde Ede, hovetlinge vurscr., vor uns, unse ervent, nakomelinge, lande, lude unde undersaten, dat wij alle punct, wo vorg. uns andreppende semptlick unde itlick besundern gelovet unde geseckert heben, loven unde seckeren overmyts dessen breve myt unsen eeden vullenkomelike, stede, vast unde unverbrocken to holdene, unde heben des to bevestinge unde in getuychnysse der waerheyt vor uns, unse ervent, nakomelinge, lande, lude unde undersaten vurscr. unse segele by des erwerdigen fursten unses genedigen leven heren, heren Conraitz, bisscops to Munster unde administratoris der kercken to Osenbrugge, unde zyner genaden capittels to Munster segele an dessen breff gehangen. Hijr weren mede, an unde over de edele unse leve neve, raet unde getruwe Johan, greve to Oldenborch vurscr., Godert Ketteler ritter, her Berndt van Lynthell unde her Johan Valcke, canonike unser kercken to Munster, unse marschalek Johan Hake ton Wulvesberge unde Wilhelm van den Busche. Gegeven in dem jare unses Heren dusentveerhundert negen unde negentich, up sunte Petri ende Pauli apostolorum avendt.

Recto:

«‹›»