Der Statthalter von Friesland, Herzog Albrecht von Sachsen u. s. w. bestätigt den Grafen Edzard und Uko von Ostfriesland, nachdem sie ihn als Statthalter anerkannt haben, alle ihre kaiserlichen Privilegien.
Wir Albrecht, von Gottes gnaden hertzog zu Sachssen, lanndgrafe in Doringen und marggrafe zu Meyssen, Romischer kuniglicher majestat und des heiligen Romischen reichs ewiger gubernator in Friessland. Nachdem die edeln und wolgebornen heren Edezart und Uko, gebrueder, grafen zu Ostfriesslannd, fur sich, ire erben und nachkumen mit iren landen, herlichaiten und undersassen uns, unser erben und nachkumen angenomen und erkhandt haben von wegen Romischer kuniglicher majestat fur ere ewigen gubernator und potestat in Friessland, und sollen alweg hinfuro, dieweil wir oder unser erben gubernator und potestaten sein, also beleiben nach inhalt unser commissien, die wir von dem allerdurchleuchtigesten und grossmechtigisten fursten und herren, heren Maximilian, Romischen kunig etc., daruber haben, und als dieselbigen heren Edezart und Uko, grafen zu Ostfriessland, und ir vorfare von den allerdurchleuchtigisten weylend hochloblicher gedachtnuss des heiligen Romischen reichs keisern und kunigen mit derselbigen irer grafschaften und landen etc, begnadet, belehent und gegeben, alles nach inhalt irer briefe und segell, bekennen wir mit diesem unserm brief, das wir fur uns, unser erben und nachkumen den vorgenanten grafen Edezart und Uko, ire erben und nachkumen, in craft und macht unser commissien als ewiger gubernator des heiligen reichs, alle soliche privilegia, herlichaiten und freyhaiten, darzu die alten und loblichen gewonhaitten und herkomen bey iren vorfaren gehalten, auch so vor von keysern und kunigen ine gegeben, alle und yede soliche privilegia, herlichaiten, freyhaiten, auch die alten loblichen gewonhaiten und herkumen, so vorhin confirmirt, ratificirt, und approbirt haben, confirmiren, bestetigen und approbiern mit diesem unserm gegenwurtigen briefe in allen iren artigkeln, puncten und meynungen in der allerbesten form, mass und weise, nichts ausgeslossen, wie das am creftigsten und bestendigsten sein mag, und insunderhait und nichts mynder dann weren sy alle von wort zu wort in dieser unser confirmation inserirt, begrifen und geschriben. Hierumb geloben und versprechen wir fur uns, unser erben und nachkomen den obgemelten grafen, iren erben und nachkomen bey unsern woren furstlichen worten und guten glauben alle soliche privilegia, herlichaiten, rechtlichaiten und freyhaitten, darzu die alten gewonhaiten und herlichaiten zu allen zeitten in iren artigkeln und puncten stet, vest und unverbrochelich zu halten sunder einich gebrech darin zu tun oder lassen scheen, und unser commission sol gemelten grafen, iren erben und nachkomen an iren freyhaiten und privilegia unschedlich sein. Wir, unser erben und nachkumen wollen auch die gemelten grafen, ire erben und nachkomen bey den graffschaften, landen und herlichaiten handthaben schutzen, schirmen, die sy in gehorsam halten, und die ungehorsamen zu gehorsam helffen bringen nach allein unserm vermogen, als ewiger gubernator und potestat des heiligen reichs; bekennen auch fur uns, unser erben und nachkumen, geben auch den gemelten grafen, iren erben und nachkomen volle macht von wegen unser commissien als ewiger gubernator der Friesischen land von wegen und in namen der Romischen koniglichen majestat in irer grafschaft und landen auf derselbigen eingesessen zu setzen und zu ordnen und ir, irer erben und nachkumen nutzen und fromen aller und yeder axcisen und umbgelt, so wir die in unsern Friesischen landen aufgesatzt haben und hernachmals aufsetzen und verordnen werden, alles getreulich und ungeverlich. Des zu merer urkhund haben wir unser furstlich innsigell an diesen unsern brieff tun hengen. Geben in unser stat Leowarden, auf den andern tag des monats Octobris, nach Christi unsers lieben Heren geburt viertzehenhundert und im neun und neuntzigsten jare.
x
| Editionen |
E. Friedländer, Ostfriesisches Urkundenbuch II (Emden 1881), nr. 1638 |
