| Nummer:oub1659 | Datum:Norden, 30. Mai 1500 | Überlieferung:Editie | Fundstelle:Ostfriesisches Urkundenbuch, II, S. 632, nr. 1659 |
Heirathsvertrag zwischen Folkert (Beninga) zu Grimersurn
In den namen Godes. Amen. Witlich unde openbar si all den, de dussen breff seen of horen lesen, dat in deme jare dessulven unses Heren Godes dusent vifhundert, in der derden indictien, des sunavendes des dertigesten dages in der meymanet, des alrehilgesten in Gode vaders unde unses heren, heren Allexanders des sesten pawes bisdoms in dem sovende jare, synt vor my notario unde tughen nabeschreven personliken gewest de edelen unde erbaren heren mester Hicke, doctor in beiden rechten unde prost to Emden, mester Hidde, kercher to Haghen, Her Mauritius, Rembert, Tanno unde Kanke, hovetlinghe tho Dornum unde Witmunde, van weghen der erbaren junferen Nonen, eren leven sustere unde moyen, van deme enen parte, unde Folkmar to Grimersum unde syn broder Gerhold, prost tho Hinte, unde Aylike, hovetlinc to Uphusen unde Nesse, van der anderen siden, unde hebben to love linde ere Godes almechtich ene hillighe echte unde hillikesvorword gernaket in mate unde wise, alss nagerort wart: in dat erste schal Folckmar vorg. myt junfer Nonen to brutscatte hebben achte stighe demede landes, de 52 beleghen tor Inekenborch, de 30 to Loquarde, de nu Haye bruket; noch dertich to Uttel, dat Mamme Smyd nu tor tijd bruket. Noch dertich to Uttel, dat nu Hayo Gommelen in der hure hevet. Noch achteyne to Uttel, dat Ayld nu ghehuret hefft. Item hierto schal se mede brenghen to brutscatte in klennoden, sulver unde golde, int erste einen pael unde ene arenghe, eynen stickelband unde enen nesschod, unde eyn span unde enen peninck unde dre vorgulde gordel, unde en surkelt[*] myt ses schetsom, und twe beslaghen tabberde, unde enen vorgulden halsband myt anderen klederen unde klennoden, de se dagelikes dregende is. Item vortmer, wert sake, dat de vorg. Folckmar eer se aflivich worde, se schal se bliven up der borch, so lange se levet, unde darboven hebben tor lifftuch vertich grase landes by der borch er best beleghen. Wert aver, dat se en ander berad don wolde, off myt willen de borch verlaten, so scal se hebben vertich grase landes to Circuwerum belegen, so gud de 40 to verguden unde vul to maken. Wederumme wert, dat junfer None vorg. er one aflivich worde, so scal desulve Folckmar up syn liff hebben vertich demede landes to Uttel belegen, dar mach he uthkesen enen meyer to so vele landes, dat de 40 demede to Uttel vullentoghen werden. Up alle unde itlike punten hebben de parten vorg. instrumenta, openbar breve unde tuchnisse van my notario nabeschreven begheret to makene in der besten formen, mate unde wise. Dit ys geschen to Norden in heren Feiken huse, in deme jaren, dage unde maned, so en boven ghescreven stat. Hir hebben an unde aver vor tughe gewest de werdighen unde erbaren heren, her Feyke, kercher to Norden, unde her Johan, kerker to Wirdum, her Johan van Bulderen ende her Meynard van Dile, prebendaten dersulven kecken to Norden, unde vele ander tughe genoch darto geeschet unde geropet.
To merer tuchnisse der warheit heb ick Johan Smedes, kerker to Meppen des stychtes to Osenbrugge, pawesliker unde keiserliker macht notarius, dit instrument unde breff myt myner hant gescreven unde underschreven.
To merer tuchnisse der warheit heb ick Johan Smedes, kerker to Meppen des stychtes to Osenbrugge, pawesliker unde keiserliker macht notarius, dit instrument unde breff myt myner hant gescreven unde underschreven.
