| Nummer:oub1663 | Datum:19. Sept. 1500 | Überlieferung:Editie | Fundstelle:Ostfriesisches Urkundenbuch, II, S. 634, nr. 1663 |
Der Pfarrer zu Emden etc. Heinrich Wessel bekundet, dass Almar Yelrichsna zu Emden den ihm gehörigen Antheil einer Reihe von ihm und dem Schiffer Iwe Romer besessenen Grundstücke dem Matthaeus Nykamer zu Emden wiederkäuflich verkauft und dem Romer die Pacht daran vorbehalten habe.
Ick mester Herman Wessel, kercher tho Emeden unde van bevele des weerdighen officialis van Oestvreeslande daersulves commissarius, erkenne unde betughe in unde vormyds dussem mynem apenen beseghelden breve voer alsweme, wo voer my unde der tughe hyrna bescreven jeghenwordicheit ys ghekomen de beschedene Almar Yelrichsna, borgher in Emeden, unde bekande apenbaer daersulvest, dat he myt vryen willen unde voerberaden mode hadde vorkoft unde vorkofte jeghenwordich in kraft s breves to enem vasten steden ewighen erfkope deme erbaren manne Mattheus Nykamer, wonende bynnen Emeden, dat darde part desses hyrna bescreven landes, dat schipper Iwen Romer to Gheerltweer unde deme vorscr. Almar tosamende tohoert; int erste veerteyn grase in Barmschemeden, item teyn grase in Rysummer hamrick, item veerdehalff grase uppe Borghen, item twe grase by Rodevorwerck, item eyn demed in Laskelundlaghe, item vijff grase in Pennynghemede, item eyn demed by Gheerldsweer; eyn ydlick gras voer ses golden Rynsche gulden, welck ghelt eme degher, vul, al unde wal, de ene pennynck myt deme lesten, to syner voller noghe unde willen van deme ergenanten Mattheus ys untrichtet unde betaelt, dat he eme hochliken bedancket; worumme sal unde wil Almar vorscreven unde syne erven und anerven int ewich deme ergenanten Mattheus unde synen rechten erven ofte holder s breves myt rechte int ewich alsodaen darde part landes voerbewert vry unde qwyt, ledich unde loes waren voer alle ansprake jeniges rechtes; wert ock sake, dat Mattheus unde syne erven jenich hinder, scade ofte vordreet qweme s landes halven, sal unde wil Almar vorscr. unde syne erven gansliken untrichten. Hijr ys inn beraemt, dat Almar vorscreven unde syn erven moghen to veer yaren neghest na datum s breves, elkes yares up sunte Mattheus dage ofte achte daghe daerna unbehaelt eyn ydlick gras myt ses golden Rynschen gulden wedder vry kopen sunder jemandes straffent. Weert oeck sake, dat sodane wedderkoep bynnen den veer yaren nycht en scheghe van dat dat ganse darde part des landes also vorscreven ys, so salt eyn ewich erffkoep blyven, dyt alle sunder arghelist, unde ys belevet dat de vorben. Romer to Gheerltswer sal dat land in der hure beholden, indeme he daervoer gheven wyl, also yd ghelden mach. Tugheslude hyrto gheropen unde ghebeden synt ghewest de beschedene mans schipper Iwe, Ocko Boelsen unde Hynrick Puthman, borghers to Emeden. To merer orkunde der warheyt, so hebbe yck mester Herman, kercher ergenant, myn ingheseghel durch bede willen Almars vorscreven benedden to dusseme breve ghehanghen. Gheven na der boert Christi unses Heren dusend vijffhundert yaer, des saterdages voer sunte Mattheus dage des hilghen apostels unde evangelisten.[*]
