Der Wardein Heinrich pachtet auf ein Jahr die Waage zu Emden für 1540 Arensgulden.

Anno XV^c, ame dage Martini episcopi, hevet Hinrick, wardeynne, de wage der stadt Emeden gehuret ein jair langk to gebrueken, als sick na vermeldonge der rulle geboirt voir viffteinhundert unde viertich Arensgulden, in Frieslandt na der tidt ganckbair, 15 krumstert voir den gulden to rekennen, und sall sodanne gellt betalen up dren termynen, alls den ersten up midvasten, den anderen up Jacobi unde den lesten termyn upp Martini dairna, unde hevet dairvoir borgen gestallt, als de ersamen Uken, goltsmidt, unde Gerdt, goltsmidt, borgere der stadt Emeden, de dairvoir gelavet hebben; des hevet Hinrick einen eitt gedaen, der stadt Emeden gerechticheit der wage halven unde broke dairan langende nicht to vermyndern, dan na sinen vermoge in wesende tho holden, ouck nemandts in wage ader anders ungelyck to doen ader durch sine geschickeden doen laten, myns gnedigen leven heren broke clairlichen antekennen unde nicht verlaten aen weten myns gnedigen heren. Getekent ame dage voirgescreven, in bywesende der erberen unde ersamen Uden, drosten to Emeden, Tannen von Oldersum, Nicolai secretarii, borgemeistere unde raidtlude der stadt Emeden voirgescreven.
Nicolaus secretarius, teste manu.

x

x

Bestand	Ostfriesisches Urkundenbuch, II
Fol. Nr.	S. 640
Nr	1669
Olim	Gleichzeitige Eintragung im Emder Protokollbuch. Rathsarchiv, Nr. 846.
Jahr	1500
Datumcode	Martin

x

x

Material	papier

x

Editionen	E. Friedländer, Ostfriesisches Urkundenbuch II (Emden 1881), nr. 1669