| Nummer:oub1707 | Datum:Den Haag, 11. Sept. 1398 | Überlieferung:Editie | Fundstelle:Ostfriesisches Urkundenbuch, II, S. 666, nr. 1707 |
Herzog Albrecht von Baiern, dem die Häuptlinge Widzel tom Brok und Folkmar Allena ihre Herrlichkeiten zwischen Ems und Jade zu Lehn aufgetragen haben, verspricht, sie gegen Jedermanns Ansprüche auf diese Gebiete zu schützen.
Aelbrecht etc. doen cond allen luden, want ons Widzelt, heeren Ocken zoen, ende Volmaer Allen zoen, hoeflinghe aen gheenre side de Eemse in Oestvriesland, ons upgedraghen ende quytgescouden hebben alrehande goeden, heerlicheden ende landen, die sij nu ter tyt hebben ende houden, gheleghen tusschen der Eemse ende der Jade in Oestvrieslant, die wij him weder verliet hebben te houden van ons ende van onsen nacomelingen, him ende horen nacomelinghen tot sulken rechte ende leen, als die brieve begripen, die sij van ons daerof hebben, soe hebben wij den voirscr. Widzelt ende Volmaer vorder gheloeft ende gheloven mit desen brieve waer dat sake, dat wij van yemande, wie hi ware, horen maghen of vremden, versocht worden om die voirscr. goede te verlenen, wes rechts dat sij him daertoe vormaten te hebben, dat wy daerin, in voerme van recht mit wille of mit verlijinghe gheenrehande sake doen en sullen, dat den voirsc. Widzelt ende Volmaer of enich van him luden jeghens draghen mochte. In orconde etc. Gegheven in den Haghe, upten elften dach van Septembri, anno XCVIIIo.
