| Nummer:oub1709 | Datum:Den Haag, 11. Sept. 1398 | Überlieferung:Editie | Fundstelle:Ostfriesisches Urkundenbuch, II, S. 667, nr. 1709 |
Widzel tont Brok und Folkmar Allena versprechen dem Herzog Albrecht von Baiern u. s. w., welcher sie mit gewissen zwischen Ems und Jade gelegenen Herrlichkeiten belehnt hat, ihren Einfluss geltend zu machen, dass ihm die Stadt Groningen huldige, und ihm erforderlichen Falls in der Fehde gegen dieselbe beizustehen.
Wij Widzel, heeren Ocken zoen, ende Volinaer Allen zoen, hoeftlinghe aen gheenre side der Eemse in Oestvrieslandt, doen cond allen luden, want die hoechgeboren vorste, onse lyeve genedige here, hertoge Ailbrecht van Beyeren, grave van Henegouwen, van Hollant, van Zeelant ende heere van Vrieslant bi onser updrachte ende sijnre ghenaden ons verlijet heeft ende verleent alrehande landen, heerlichede ende goeden, gelegen tusschen der Eemse ende der Jade in Oestvrieslandt, soe hebben wij ende elx van ons gheloeft en gheloven mit desen brieve onsen lyeven heere hertoghe Ailbrecht voirscr. ende sinen nacomelinghen onse beste te doen na alre onser wetentheit ende machte, dat dieselve onse lyeve heer ghehult ende ontfaen worde bynnen der stadt van Groeningen tot horen rechten heere, scout ende gherecht dairin te setten ende te ontsetten ende te hebben ende uptebueren olle forfeyten ende vervallen, dat him mit recht toebehoert. Ende waer dat sake, dat die van Groeninghen voirscr. onsen lyeven heer dairin wederstandich ende overhorich waren, soe gheloven wij onsen lyeven heer voirscr. hulpich ende bestandich wesen in sinen orloghe tieghen derselver stat van Groeninghen ende enen yegeliken dies mit him tieghen onsen lieven heere voirs. begripen wilde, ende dier ende derselver stad vyant te worden mit onsen lyeven heer, wanneer wij des van him vermaent sullen worden. In orconde etc. Ghescreven in den Haghe, opten elfsten dach van der maent van Septembri, anno XCVIIIo.
