| Nummer:oub1749 | Datum:16. Aug. 1408 | Überlieferung:Editie | Fundstelle:Ostfriesisches Urkundenbuch, II, S. 705, nr. 1749 |
Hamburg an die Preussischen Städte: berichtet über den Erfolg seines Unternehmens gegen die Vitalienbrüder, bei welchem es nur von Kampen und Amsterdam, und neuerdings von Lübeck, mit je 100 Mann unterstützt ist, während es selbst erst 300, dann 200 und jetzt nochmals über 200 Mann ausgeschickt hat. Begehrt, dass sie ihm vorläufig 1000 Nobel leihen.
Na dem grute. Besundere leven vrunde. Ju mach wol vordenken, wo wy ju vortiides gescreven hebben, dat de vitalienbrodere ut Vreslande gezegelt weren in de zee vor unses Hern hemmelvard dage lest vorleden, unde hadden do alrede groten schaden dan. Darumme sande wy do unse vrunde mer denn mit 300 jegen de vitalienbrodere in de zee, de mit Godes hulpe de vitalienbrodere engheden, dat se alle segelden in de Wester Emzee unde gyngen to lande up een slot geheten Valren; dar brochten se mit sik beyde vanghene unde schepe, de se nomen hadden. Up deme slote heelden se unse vorscreven vrunde alse lange, dat se uns screven umme mer hulpe, want se meenden dat slot to beleggende. Do arbeidede wy, alse wy vlitlikest konden, by den steden, dar wy uns des to vormodende weren, umme ere hulpe darto to doende, allene dat uns neenerleye hulpe wart, men van den van Campen unde Amsterdam, de malk 100 weraftich by unsen vrunden hebben; van den van Lubeke unde allen andern osterschen steden konde uns neenerleie hulpe noch trost darto werden up dat erste. Men alse gy uns do screven, dat gy uns na gebornisse gerne wolden de last helpen dregen na utwisinge der olden ordinancie, des wy ju vruntliken danken, darumme redde wy over uth unses rades kumpane unde vrunde boven 200 wapent, unde sanden de vor Valren, de mit Godes hulpe unde unser vrunde, de se dar vunden, unde anderer, de se dar bynnen landen totheen konden, dat slot beleden unde stormeden, also lange dat de vitalienbrodere dat meeste del by nachte dat slot, de schepe unde vanghene, de se nomen hadden, vorleten; doch een hovetman van en, geheten Hake, de wart dar gerichtet unde up een rat geleght; ok wurden ichteswelke bynnen unse stad gebrocht, de dar gerichtet wurden. Unde alse dat vorscreven slot gewunnen was, dar unse vrunde ichteswelke doden unde vele wundeder lude over nemen, du manneden se dat slot unde toghen vort vor Osterhusen, dat se des geliik ok wunnen unde manneden. Do screven se uns over umme mer hulpe, wante en duchte nutte unde behuff wezen, vortan to theende vor Haren unde Ennen slote in der Greth, unde ok vor etlike andere slote, daraff vortiides de vitalienbrodere dem copmanne groten schaden totoghen hebben. Hirumme sande wy over unser vrunde mer den 200 uth; dar sanden uns de van Lubeke to 100 weraftich; men de 300 hebben lange tiid gelegen unde liggen noch, alse wy uns vormoden, van wyndes not wegen up der Elve. Jodoch hebben unse vorscreven vrunde uns gescreven, dat se sodder Haren unde Ennen unde ok etlike andere slote wunnen hebben, welke unde ok Valren unde Osterhusen se meenen to stortende up twe na, er se dar utme lande theende werden, unde de 2 slote sullen der stede opene slote bliven. Men se sint noch umme ichteswelke andere slote bekummert, unde hopen, oft God wil, dar id so to bestellende, dat in der jeghene neene vitalienbrodere mer untholden scholen werden. Des dunket uns unde en, dat me noch mer koste unde arbeides darumme don moete; also kone wy juwer leve noch nicht enkede scriven, wes de gantze reise costende wert. Hirumme, leven vrunde, alse gy uns nu latest gescreven hebben, wanner gy weten, wo hoghe de coste lopet van desser were, so wille gy uns, wes ju toboren mach, vruntliken wol untrichten: dar danke wy ju vruntliken umme; men juwe ersamheit mach sulven wol irkennen, dat alsodane grote koste, alse wy alle dessen somer langh dan hebben unde noch dagelikes doen moten umme des menen copmans willen, wert uns allene up dat erste alto lastich; bidde wy juwer leve, alse wy vruntlikest konen unde mogen, dat gy uns sunder lange togheringe willen lenen unde schicken to hulpe bynnen Lubeke 1000 nobelen up eene rekenschop. Wanner unse vrunde de reise, oft God wil, gantz geendet hebben, so wille wy ju gerne enkede rekenschop scriven, wo hoge unse koste lopet; hebbe wy denne ichtes to vele upgebort van ju, dat wille wy ju to danke gerne wedder untrichten. Leven vrunde. Willet ju hirane also vruntliken bewisen, alse wy uns to ju wol vorhopen, dat wille wy gerne vordenen, wor wy mogen, wente wy wol boven 800 weraftich to schepe uthe hebben. Siid Gode bevolen. Gescreven under unser stad secrete des donredages na assumptionis Marie. Beghernde des juwe vruntlike antwerde by dessem sulven boden.
Consules Hamburgenses.
Consules Hamburgenses.
