| Nummer:oub1770 | Datum:31. Jan. 1429 | Überlieferung:Editie | Fundstelle:Ostfriesisches Urkundenbuch, II, S. 733, nr. 1770 |
Häuptling Udo von Norden schlichtet einen Streit zwischen Poppo Manninga und Albert Tyen über die Hinterlassenschaft des Tyalde Godinga und der Rexet Albersna.
Ich Udo, hovelyng to Norden etc., bekenne und betuge openbare vor allen guden luden, de dessen breff zen, lesen oder horen lesen, dat ick mit gudduncken mynre frunde hebbe gescheydenn und eine fruntschop gemaket tuschen Poppen Mannynga, synen kinderen und erffnamen, van der eyne zyden, und Albert Tyen, synen kinderen und erffnamen, van der anderen zyde, van gude wegene, de se inn tweydrachten hadden, als van Tyalde Godinga[*] und Rexet[*] Albersna, der God beyde gnade, und hebbe dat gescheyden na fruntschapen, als se des do ter tydt by my bleven mitt guden willen, beradenen mode van beyden zyden in desser nabescreven wyse: dat Albert Tyen, syne kinderen und erffnamen, zolen hebben, beholden und bruken to ewigen tyden al der gude, beyde bewegelick und unbewegelick, de se hebben in erer gewalt und do ter tydt under hadden und brukene weren van Tyalden vorg. zunder wedersprake. Poppe, zynre kinderenn und erffnamen zolen beholden und bruken der gude, de se in erer were hebben von Rixet gude wege zunder wedersprake Albertes, syne kinderen und erffnamen, und eyn itlicke zal des bruycken, als ick dat gescheyden hebbe, sunder jenigerleye ansprake der anderen, by eyner poene van twen hundert Arnssguldene to broke den hovetlinge van den lande, dar en do ter tydt wol an genogede van beyden zyden zunder jenegerleye wedersprake. Hyr weren an und over Bene Aldersen[*] upter Ternessen und ander luyden genoch. In orkunde der warheyt, dat dit stede, vast und unvorbroke blyve, so hebbe ich Udo vorg. myn ingesegel umb bede willen van beyden zyden an dessen breff gehangen. Datum anno Domini duysent veerhundert negen und twintieh, in anteprofesto purificationis Marie.
