| Nummer:oub1780 | Datum:Cloppenburg, 22. Juli 1438 | Überlieferung:Editie | Fundstelle:Ostfriesisches Urkundenbuch, II, S. 742, nr. 1780 |
Bischof Heinrich von Münster an Danzig: erklärt, dass er Heinrich Vorrath und Genossen habe festsetzen lassen, weil Lübeck und Hamburg aussagten, dass die Eroberung von Emden und die Gefangennahme Imelo's im Interesse aller Hansestädte geschehen sei.
... begheren u hiirup to weten, dat wii myt unsen schrifften talen und anspraken hebn doen anlangen und vorsocht borgermestere und raet der stede Lubick und Homborgh umb, sake uns und unse gestichte andrepende, nementlike dat se myt gewolt sunder gericht und recht overvallen synt Ymelen, unsen und unses gestichtes provest und hovetlinck to Emeden in Vreslande, de unse und unses gestichtes gesworne und gehuldede man und provest is van sodaner provestie, tollen, guderen herlicheiden und gerichte, alz wii dar hebbene synd, der se sich underwynden hebn und noch underwynden sunder jenigerleie reden off tosaghe, der wii uns vorseen off weten van en to uns to hebben. Und denselven unsen provest noch ok in eren hechten und gevencknisse holden, dar wii dickwiile deselven borgermestere und raet der stede Lubick und Homborg umb myt unsen schrifften und bodesschaften an vorsocht hebn, uns denselven unsen provest quyt to ghevene und uns unvortoghet daghe darumb to bescheden und to done ere und recht, des wii mogeliken van en van der sake wegen egheden und geborde. Dar se uns tor antwert up gescreven und to kennen gegeven hebn, wat se des gedan hebn, dat se dat van der ghemeynen hensestede wegenne gedan hebn, dat uns und unsen vrenden doch seer vromede duchte, want wii ummers wynt an disse jeghenwordige tiit nicht uttostande meynden to wesen und to hebn dan vruntschap und gelove myt den ghemeynen hensesteden. Und wii und de unse des genslike unbesorget meynden to wesen van en und den ghemeynen hensesteden, in maten wo vurgescr. is, se en hedden uns und unsen gestichte mogeliken erst dat to kennen gegheven. Welker sake vurgescr. uns de ergenanten burgermestere und raet Lubick und Homborg nach vorwegeringe gedan hebt und dechlikes dot, des wy und unse gestichte gensliken groten schaden, smaheit, last, krot und hinder hebn ... Er habe deshalb um seines Stiftes Ansehen zu wahren den erbaren man Hinrick Vorrait, medeborgermester to Dantsicke, ... myd andern synen medeverden und gesellen ... myt gerichte doen kummeren und besatet, umb Ymelen, unsen provest to Emeden vurgescr., uns den van den steden Lubick und Homborg quyt to makene und en weder an unse und unse kerke gudere, recht und herlicheit to Emeden to latene ... In castro Cloppenborg, die beste Marie Magdalene, anno Domini etc. 38.
