| Nummer:oub1793 | Datum:Norden, 16. Mai 1459 | Überlieferung:Editie | Fundstelle:Ostfriesisches Urkundenbuch, II, S. 748, nr. 1793 |
Häuptling Ulrich von Norden u. s. w. giebt den Osnabrückern auf Wunsch des Abtes Bernd von Norden freies Geleit bis zum 29. September, um in seinem Gebiete ungestört Handel treiben und reisen zu können.
Juw ersamen unde vorsichtigen beschedenen mannen, borgermesteren unde rade des stades to Osenbrugge, doen wy Olrick to Norden, Gretsyl, Aurike, Emden etc., hovetling in Oestvreslande, weten, soe dat de erwerdige in God vader unde dogentsame here, hern Bernd, abbaete to Norden, uns nae lude unde begheringe juwer scriffte an sine ersamheit van der sake twischen Herborde van Snetlage unde juwen stichte van siner weghene unde uns vorresen van holtes weghene, gescreven unde gesant, zere vlitliken angheworven hevet; des wy umme des erben. ersamen heren bede willen juweme copmanne unde borgheren, de an unse ghebede umme ere kopenscopp unde neringhe dencken to komende, untheten hebben unde geven jegenwordich en gud, rast, velich gheleide, van deme datum desses breffs antogande went up den nogesten sunte Michaelisdach erstenvolgende durende, soe dat de juwe myd ereme gude under desser tyd an unsre herlieheiden unde ghebeden an unde aff wal geleidet reysen moghen vor uns unde alle deghenne, de umme unsen willen doen unde laten willen, unde ok myd rechte schullen sunder argelist. Is ok juwe ersamheit an den erwerdigen heren juwen bisscuppe desse zake annemen wille up ene sekere tyd to vorschedene, vorarbeiden laten moghen, willen wy denne, alze uns sodane scrifft van deme vorben. juwen heren ghekomen ys, up leghelike stede tieghen Herborde erffnamen unse vrunde to sendene unde syn gnade uns parte, dar dene ok an unser schelinge entliken ame rechten vorscheden wille, juw unde juwen borgheren desser tosaghe vortmer vorlaten unde vorkesen, unde wes wy juwen ersamheiden in allen ghelympliken saken to willen vormoghen, dar schullen gy uns an allen tyden gutliken unde gudwillich to bevinden. Zyd Gode an langen tyden gesund bevolen. Gescreven to Norden, under unseme secrete, ame midweken to Pinxten, anno etc. LIXo.[*]
