Johan van Haefften, landcommandeur van de Duitse orde, balije van Utrecht, bekrachtigt voor buren te Witten de ruiling tussen de commandeur te Bunne en de abdij Assen van het door de buren van Witten aan de commandeur toegewezen land op Geelbroek in de Wittermarke, strekkende zuidwaarts tot de Haelresloet, tegen de smalle tienden van de abdij over het goed van de Duitse orde Lutke Bonekinge te Witten, onder voorbehoud, dat de meiers van de Duitse orde te Witten zullen mogen weiden en hooien, net zoals de overige meiers in die marke. Met bezegeling met de zegels van de (Duitse) huizen van Utrecht en Bunne.

Wy Johan van Haefften landcomptuer der balyen van Utrecht duytscher orden bekennen in dessen openen breve
voer ons ende voer onse naecomelinge dat al sulken wissel als heer Wolter van Overhagen comptuer do ter tijt to Bunnen
ghelegen in den lande van Drenthe ende in den kerspel van Vrees ghedaen hefft myt joncfer Golden Stellinx abdyssen
des cloesters van Assen ende horen conventsluden ewelike ende erfflike stede ende vast to bliven al sulck lant als de buur van
Witten heer Wolter voerscreven to bewiset hebben op Gheel-broeck in Witter merck ghelegen ander wester zijt des cloesters voerscreven
to slaghe opghaende sudert op Haelresloet voer den smalen tenden de dat cloester voerscreven hadden over onsse guet to Witten
voerscreven gheheten Lutke Bonekinge beholden daerinne onse meyers to Witten to weyden ende to hoyen gheliken anderen buren ende des
cloesters voerscreven meyers in der mercke voerscreven. Ende wy Johan van Haefften landcomptuer voerscreven bekennen mit dessen yeghenwordigen
bezeghelden breve dat dit onse wille ende consent ghewest is ende onsen willen daer to gheven overmids to staen onser ghemeenre
balyen voerscreven also dat wij overgheven ende overghegheven hebben, quijt ghesculden ende quyt schelden mijnre vrouwen der abdyssen voerscreven
ende horen convents luden dit voerscreven lant to besitten ende to ghebruken tot ewigen daghen daer van den eygendoem als dat wij noch onse
nakomelinge to gheenre tijt daer op meer hebben to spreken. Ende hijr entendes hebbe wy hijr van vertegen alles rechtes ende eygendoems
to behoeff mijnre vrouwen der abdyssen ende horen cloesters luden voerscreven ende den stock hyr van gheleget als een lantrecht is in Drenthe.
Ende wy Johan van Haefften landcomptuer voerscreven sullen ende willen der abdyssen ende horen cloesters luden voerscreven hyr van rechte waerschap
doen tot allen tiden voer alle deghene de des to rechte komen willen to landrechte woe vake hem des noet ende to doende is. Alle argelist
ende wes men dessen vorwarden ende coep voerscreven to hinder vinden mach hijr in uutghesecht. Hijr weren an ende over heer Johan Alberts do
ter tijt koster to Vrees, Steven ter Borch ende Johan van Steenwick de jonghe, Johan Hiddinge Pipensoene ende Tide-man Avinghe als
dedingeslude, Johan Tidens ende Johan Roericks over dat stock leggen als buur to Witten voerscreven. In oerkunde ende in een tuuch der
waerheyt so hebbe wy Johan lantcomptuer voerscreven voer ons, voer onse naecomelinge onses huses zeghel van Utrecht voerscreven an
dessen breeff beneden doen hanghen. Ende omme meer sekerheyt willen so hebbe wy dat zeghel onses huses to Bunnen voerscreven mede aen
dessen breeff ghehangen. Ghegheven int jaer onss heren dusent veerhondert ende twe ende tsestich des saterdaghes nae sunte Mathi-
as des hilligen apostels.

x

x

Archief	Drents Archief
Fonds	Arch. Abdij Assen
Inventarisnr.	95
Regestnr.	80
Jaar	1462
Datumcode	SpMatthi

x

x

Commentaar	De 2 zegels zijn verloren.

x

Materiaal	perkament
Afmeting (mm)	290/145-155

x