Wilhelmus Frederici en Doko Groeuinck "doctores" en Jacobus Balcke, pastoors respectievelijk van de St. Martini-kerk te Groningen en te Middelstum en te Baffloe, bepalen -, als scheidslieden tussen de executeurs-testamentair van wijlen Mr. Johan van den Velde pastoor van de kerspelkerk te Werffum en zijn erfgenamen (waaronder de abdis te Assen die optreedt voor zuster Beerte zuster van de erflater), - dat het testament van kracht zal zijn; dat enige vermelde makingen (waaronder voor de kerk, een nieuwe vicarie en de pastorie te Werffum, voor de kloosters te Werffum en te Wytwert en de nieuwe vicarie te Rolde) eerst zullen worden uitgekeerd en daarna de schulden betaald, en dat de erfgenamen het overige zullen ontvangen.

Wy Wilhelmus Ferderici [sic], Doko Groevinck doctoeres ende Jacobus Balcke der kercken to sunte Merten in Gronin-gen tho
Middelstum ende tho Bafflo pastores overman ende ghecoerne dedingslueden inder schelinge ende twyst tusschen die
werdighe ende ersamen heer Hermen Commenduer heer Hinrick van Zwolle mede priester to Wrffummer cloester ende Steven
Broyll executoeren des testamentes van mester Johan van den Velde saligher gedachten pastoers der kerspel kercke to Werf-
fum an die ene ende der wererdighe ende religiose ende ersame vrou Reynalt abbatissa toe Assen van wegen hoers cloesters
mede suster Geerten salighe mester Johans vorscreven echte suster, Ffrederick Latteringhe to Gheten van weghen Greten
syner echter huesvrowen oeck mester Johans vorscreven echte suster ende Hermen Elevelt des selven mester Johans vorscreven erffgenaam
an die ander syden heercomende van vermeringhe ende ver-cortinghe des testaments vorscreven etcetera. Hebben dan wy voer-
ghenoemde overman ende dedingslueden dat selve testament voerscreven mitten besten doerghesien ende betrachtet ende oeck
mede der beyder parten voergenoemd woerden, meninghe ende reden ghehoert ende wal verstaen ende in bywesen ende myt consent
der vorscreven parten hebben wy ter vruntscappen uutghe
sproken in formen ende maneren nae bescreven: Inden ersten
hebben wy dat testament dat salighe mester Johan ghemaket hevet inder weerden ghekent in alle formen ende
maneren hyr nae bescreven ende tot verbeteringhe des testaments hebben wy uutghesproeken: Inden eersten dat alle dat
lant dat salige mester Johan gecofft hevet inden kerspel toe Werffum ghelegen oft daer omtrent daer sal men
voer al van betalen ende vernoghen den kerckvogheden to Werffmer kerspelkercke van alle hoer ansprake die sie
up salighe mesetr Johan vorscreven ofte up syne guederen vermoeden toe hebben. Ende wes dan van den vorscreven lande over-
blyvet dat sal wesen, comen ende blyven ewelicke to vulleste ener nyer vicaryen inder kercken toe Werffum vorscreven
van welcke vycarye die collacie ofte gave sollen hebben tot ewyghen dagen die pastoer in der tyt toe Werffum myt
den oldesten kerckvoghet aldaer. Ende die vicarius sal schuldich ende geholden wesen alle weke ene misse to lesen
voer salige mester Johan voerscreven ende sal alle jaer den selven mester Johan vorscreven up syn sterffdach beghaen in der
kercken toe Werffum nae der kercken sede ende ghewoente sal oeck mede schuldich ende gheholden wesen den kerckheer
toe Werffum ghehoersaem toe wesen ende alle diesten [sic] der kercken vlytelick mede toe doen. Item, die vyff vake huesen
die salighe mester Johan hevet laten tymmeren die sollen by der wemen blyven daer sie synt. Item, dat cloester to Werffum
sal hebben die boeken Hugonis super bibliam ende daer toe veer twenter styren. Item, dat cloester toe Wytwert twe koen.
Item, die helffte van den drie mudden roggen renthe die hie hevet over die kercke toe Rolde sal wesen tot ewygen daghen
toe der nyer vicaryen inder selver kercken toe Rolde vorscreven. Item, die executores syns testaments sollen hebben elck twe nobelen.
Item, alle syne anderer naegelaten guederen replick ende onreplick woe ofte waer ofte waer/an\ die gheleghen syn ghene
uuthghesundert sollen komen an syn rechte erffgenamen van welcke guederen die erffgenamen vorscreven sollen voer al alle salige
mester Johans vorscreven schulden betalen ende wes daer dan overblyvet sollen sie vruntlicken myt malckanderen ghe-
lycke delen. Desse onse uuthsprake hevet den voerghenoem-den parten wal belevet ende hebben angenomen die alsoe
stede ende vast onverbroeken to holden tot ewyghen daghen sonder arghelyst. In oerkonde der waerheyt hebben
wy overman ende dedingslueden voergenoemt onse segelen an dessen brieff ghehanghen. Ghegeven inden jaer
onses heren dusent vyffhundert ende achte des woendesdagen nae Decollationis Johannis Baptiste.

x

x

Archief	Drents Archief
Fonds	Arch. Abdij Assen
Inventarisnr.	50
Regestnr.	123
Jaar	1508
Datumcode	EpDecJoh

x

x

Commentaar	Met geschonden zegels van W. F. en D. G. in roode en van J. B. in groene was.

x

Materiaal	perkament
Afmeting (mm)	220/160

x