Cijse Lansinghe verkoopt aan de abdij van Dickenijnghe de stallinghe over de goederen te Rensinghe en te Nijssinghe, in de marke en het kerspel van Rune, hem aangeërfd van zijne ouders; met bekrachtiging van den verkoop en medebezegeling door Johan heer van Rune.
Alien luden, die dessen brief solen sien ofte horen lesen, doe ic verstaen, Cyse*) Lansinghe, ende enkenne mit dessen openen brieve, dat ic mit vryen willen mijns selves ende mit raede ende consente al mijnre rechter erfghenamen upghelaten ende erflike vercoft hebbe, uplate ende erflike vercope apenbaer mit dessen openen brieve den abte ende den ghemenen convente van Dickenijnghe alsulcke stallinghe, als my van rechte weren anghecomen van minen oelderen ende die ic hadde over dat alinghe gued to Rensinghe ende over dat alinghe gued to Nijssinghe, gheleghen in der marke ende in den kerspel van Rune, um ene summe van ghelde, die my ende minen rechten erfghenamen wittelike ende wal bitaelt is, in alsulken manieren dat die abt ende dat convente voerscreven desse voers. stallinghe erflike, ewelike ende ummermeer vry besitten ende ghebruken moghen sonder wedersegghen ende ansprake van my ofte van minen rechten erfghenamen, ende solen hem desse voerscreven stallinghe vrywaren voor alle dieghene, die daer rechte upspreke moghen, al arghelist uytghesproken. In kennisse der waerheit soe heb ic, Cyse *) Lansinghe voerscreven, dessen brief beseghelt mit minen seghele. Ende um die meerre vestenisse desser vorwarden voerscreven soe heb ic ghebeden enen eersamen ridder, heren Johanne, here van Rune, dat hy sinen consent hierto doen wille ende dessen openen brief mede beseghelen wille. Ende wy, Johan, here van Rune, ridder, um bede willen Cysen *) voerscreven ende sijnre rechter erfghenamen hebbe overghe-gheven ende erflike verteghen, overgheven ende vertyen erflike apenbaer mit dessen selven brieve alle des rechtes, alre ansprake ende alre heerlicheit, die ons van rechte mochte wesen angheervet ende wy ende unse rechte erfghenamen hebben mochten an dessen voers. stallinghen, ende hebben daerto gheven consent ende volboerde unser ende alle unser rechter erfghenamen. Ende hebben dessen apenen breef beseghelt mit unsen seghele to enen ewighen waren tughe alle desser vorwarden voerscreven. Ghegheven int jaer ons Heren MCCC twe ende seventich, des Saterdaghes in die hilighe Paescheweke.
