Frederic bisschop te Utrecht wijst, in het geschil tusschen de abdij te Dickeninghe en Johan van den Cloester, het goed ter Hofstede, vroeger behoorende aan Heyne te Hofstede toe aan eerstgenoemde.
Frederic, by der ghenaden Codes bisscop tUtrecht, maken kond alien luden, dat voer ons sin ghecomen die eerbair ghiestelike man abt to Dickeninghe van sijns cloesters weghen an die ene sijd ende Johan van den Cloester an die ander sijd als om schelinghe willen, die sie hadden van den guede ter Hofstede, dat wilneer Heynen te Hofstede tohoerde, daer elke partye voerscreven oer af vermat in den besitte te wesen, sodat wy mit wille der beyder partyen ons annamen die kunde daervan te besien, des wy denselven partyen enen stemeliken dach legheden al betoen ende kunde, die sie hadden, voer ons te brenghen, op welken dach die partyen voers. (voer) ons quamen mit oren betoen ende tughen, die wy bescheideliken hoerden ende verstonden. Ende want wy mit onsen vrienden bevonden, dat die abt ende die hant, daer hie voer dadingde, in den besitte weren, so hebben wy den abt ende den cloester van Dickenijnghe voers. ende die hant, daer sie voer dadinghen, ghewijst ende gheset ende wisen ende setten sy mit desen brieve in die were ende in dat besit des voers. guedes mit alle sinen tobehoren dat vryliken te hebben, te besitten ende rusteliken te ghebruken tot horen oirbaer, thent dier tijt dat sie, daer mit rechte uytghesleten ende ghewonnen werden. In oerkonde des briefs beseghelt mit onsen seghel. Ghegheven ten Hardeberghe int jaer ons Heren dusent driehondert neghen ende tneghentich des vier ende twintichsten dages in Augusto.
