Der Häuptling Frederk Haren in Larrelt überträgt dem Häuptling Ulrich Cirksena den Ockenheerd.

Ik Frederk Haren, wandages hovetlingk to Lerlte, bekenne ... dat ik vries willen mit vorbedachten synne unde umme vruntschoppes willen deme eddelle juncker Olrike to Grietsiil, Norden, Brokmerlande, Esensen, Aureke unde Lengen etc. hovetlinghe, myneme leven neven, alle rechticheiden, erve unde herlicheide in seligen juncker Ocken herde, de mi vormiddelst Adden seliger dechtnisse myner oldemoder, de seligen ridder Ocken broderdochter in gewesen, vormiddelst ereme dode sint angevallen unde vorstorven, gegeven hebbe unde geve en de jegenwardigen int kraft dessen breves, so dat de vorben. juncker Olrik, myn neve, unde sine erve de vorscr. rechticheiden, erve unde herlicheiden, de mi sint angevallen unde vorstorven van seligen Adden myner oldemoder wegene, mogen unde scholen bruken to ereme besten unde willen, unde vorlate en desulven rechticheiden, erve unde herlicheide quit, vrig, leddich unde loes sunder myner unde myner erve, gheboren unde ungheboren, weddersprake in allen nakomenden tiiden. Alle desse vorscr. punte samptliken unde bisunderen love ik Frederk vorben. vor mi unde myne erven deme genanten Olrike unde sinen erven stede vast sunder jenigherleie argelist unde geverde unvorbroken to holdende, unde des to merer tuchnisse hebbe ik Frederk vorben. myn ingesegel mit willen unde witschop to desseme breve heten hanghen. Na Cristi ghebort M^oCCCC^oXLIX, des vridaghes in den Paschen.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0015
Jaar	1449
Datumcode	VpPasche

x

x

x

Commentaar	Anhängende Siegel erhalten.

x

Edities	Editie naar dit exemplaar: oub0610.