Propst Aild in Grimersum und die Häuptlinge Haro und Aild Fredericksna in Hinte schenken dem Junker Ulrich Cirksena Grundbesitz im Freepsumer, Midlumer und Westerhuser Hammrich.

Wy Aild provest toe Grimessum, Haro unde Aild Fredericksna broders, to Hint hovetlinge, enkennen unde tugen openbaer an desseme breve vor allen erbaren guden vromen luden, de ene seen offte horen lesen, woe wy samptliken myd guden vrigen willen, vorberaden mode unde by sunden mechtigen live hebben upgedregen unde gegeven, geven unde updregen an ener rechten steden vasten ewigen gave jegenwordich in unde myd krafft desses breves vor uns unde unse erffnamen, boren unde ungeboren, deme ersamen vorsichtigen unsem leven gnedigen juncheren Oelrike to Greytziil, Norden, Auwerke, Emden, Berum etc. in Oestvreslande hovetlinge unde synen erven, boren unde ungeboren, elven stige grase landen unde eyn veerendel myn 1 1/2 grass in Freebsummer, Midlummer unde Westerhuser hammerken belegen, alle unde eyn idlick bisonderen, so hiirna bescreven steyt. Int erste in Westerhuser hammerick: item 7 1/2 gras geheten Reercomper. Item 12 grase fenlandes by da Merna wey. Item 6 grase an da esckwey. Item vif grase unde een verendel geheten Hern fleyte. Item 7 1/2 gras meedlandes gelegen bii der Ee. Item viff grase bii da esckwey unde twe grase dar vaste bii. Item 12 grase in da Dykes sloe, geheten Langeland. Item vifftehalff gras in da Ewesna comper. Item vifftehalff gras geheten Kortland. Item twe grase geheten Folckmersna twe grase. Item een gras up dem uterdyke. Item een gras tillandes bii Hint. Item noch dre grase fenlandes bii der Ee. Item in Midlummer hammerick: item 11 grase fenlandes geheten Hagefen. Item 6 grase geheten Thelar. Item veer grase ynna Kummer. Item 6 grase geheten Middelsta esse. Item viff grase geheten Reyt esck. Item 7 grase fenlandes ynna Mernar. Item eyn gras ynna Boen esse. Item 3 demed uppa Medum lega trinda. Item eyn gras ynna Nomo negen grasen. Item 3 grase ynna Eskum. Item in Frebesummer hammerick: item 9 grase meedlandes geheten Euwersche. Item 7 grase yn da Mera fenne. Item 18 grase geheten Legameed. Item 7 grase ynna Haym. Item 9 grase in da Merafen. Item 3 1/2 gras in da Haym. Item negedehalff gras Halkefen geheten. Item viff grase bii Thieland. Item 6 grase in da Merna. Item viff grase yn da Herna. Item 12 grase bii da esckwey. Item 3 1/2 gras, de liggen in Egbet Boingsna land. Item twe grase ynna da Those. Item noch anderhalff gras yn da Pellinghtrae. Welck vorscr. land unde erve wii dem vorgerorten unseme leven gnedigen juncheren gensliken myd sameder hand upgelaten unde gegeven hebben, umme sodane sware lastlike unkost, teringe unde arbeides willen, als he umme den willen gedaen unde darup gedreven hevet, dat he uns bii sodane unse erve unde gudere, als de van Homborch uns entweldiget affhendich gemaket unde myd wald genomen hadden, weder gebracht unde behulpen hevet, des wii eme hiirenboven zeer guetliken dancken. Warumme willen wii unde unse erven, boren unde ungeboren, dem upgenanten unsem leven gnedigen juncheren Olrike unde synen erffnamen, boren unde ungeboren, sodane vorgerorte erve unde land rechter steden vasten unvorbrokeliker gave unde uplatinge vrig unde umbekummert erffliken unde eweliken sonder yengerleye tosage warende wesen to holdende, vorsettende, to brukende, to vorwesselende off to vorkopende, woe eme unde synen erven darmede belevet to donde sonder argelist. Vorder vortigen unde vorlaten wii Aild provest, Haro unde Aild broders vorben. sodane vorscr. land unde erve gansliken myd hande unde munden vor uns unde unse erven, alzo dat wii unde unse erffnamen, boren unde ungeboren, up sodane vorscr. erve in tokomen tiiden nummermeer generleye ansprake, klage off anlanghinge doen mogen, schollen unde willen, unde vortigen ock unde geven over alle recht gheistlick unde wartlick, de uns mochten tegens desse vorben. gave unde uplatinge denen off baten, unde loven vor uns unde unse erffnamen, boren unde ungeboren, de nummer tegens dessen breff to brukende, unde ock ghene hulpe uth dem rechten edder anders hiirtegens to sokende by unser warheyt unde guden geloven sonder argelist, hulperede unde nye vunde. In orkunde der warheyt so hebben wii Aild provest, Haro unde Aild vorscr. unse ingesegele idlick dat syne an dessen breff gehangen, unde hebben vorder to ener merer bewisinge vruntliken gebeden de ersamen heren Ennen tho Hint unde heren Clawese to Grimessum, kerckheren, umme ere ingesegele, de wii Enno unde Nycolaus vorgerort umme orer vruntliken bede willen an dessen breff gehangen hebben. Datum anno Domini millesimo quadringentesimo sexagesimo, sexta feria post dominicam, qua in ecclesia Dei cantatur Invocavit me etc.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0032
Jaar	1460
Datumcode	VpInvoca

x

x

x

Commentaar	Siegel verloren.

x

Edities	Editie naar dit exemplaar: oub0755.