Bischof Heinrich von Minden und Graf Erich von Schaumburg quittieren eine Abschlagszahlung des Brautschatzes der Gräfin Heba.
Wij Hinrik van Gottes gnaden bisschupp to Mynden, unde Erick, grave to Holsten unde Schomborch, bekennen apenbare in dusseme breve vor uns, unsse erven, dat wij van der eddelen unde walgebornen fruwen Theden, gravinne in Oestfrieschlandt, unde van oren sons, juncheren Ennen, Edzarde unde Uken junge greven in Oestfrieschlande, hebben entfangen unde upgebort to unsser fuller noege dardehalffdusend guder Rinscher gulden in affslage unde affkortinge des brutschattes, bisunderen der ersten viffdusend gulden, ere leffheyde uns, Ericken, graven to Holsten unde Schomborch, myd der eddelen juncferen Heben, der vorbenanten fruwen Theden dochter, uppe tyd, alse dat verrecesset unde beredet in, se uns, wil God, to lande komet unde wij bygeslapen hebben, mede gelovet hebben mede to gevende; alsodaner derdehalff dusend Rinschen gulden laten unde vorlaten wij unde unse erven der vorbenanten frewen Theden, oren soens vorgenant unde erven quith, ledich unde loss. Forder bekenne wij Hinrick, bisschupp to Mynden, dat de eddel unde walgeboren juncfer Hebe, unsse leve suster, [*] der vorgenanten grevinnen dochter, uns berichtet unde to irkennende gegeven heft unde ock apenbare bekant, dat se van der upgenanten orer moder ende oren leven broderen entfangen hebbe in kleynodien in guldenen unde sulveren gesmyden unde gesteynten; de se, jodoch nicht in unssem bywesende, gewerdert hebben uppe dusent Rinsche gulden unde dar en boven; welke kleynode desulve juncfer Hebe myd syck schulle unde wille nemen in de herschupp van Schomborch in desser wys, so dat recesse der brutdegedinge klarliken vermeldet, dat de upgenante fruwe Teda orer dochter vorscr. schulle mede geven to brutschatte deme genanten juncheren Ericke in redem gemunteden Rinschen golde achtedusent gude fulwichtige Rinsche gulden unde demesulven .junchern Ericke vor dusent Rinsche gulden klenode, gulden unde sulveren smyde edder an golde so ghewert, dar dan van beyden parten erringe umme in, oft de kleynodia brutschatte des vorgenanten junchern Erickes edder juncfern Heben behorich schulle sin, dat sodane de frunde beyder part in den brutdegedingen gewesen edder de dar anders werden to geeschet uppe inholt des recesses vorgerort in aller redelicheit schullen irkennen, wor de eddele grave Erick de kleynode in synen brutschatte na lude des recesses schulle to syck theyn, edder wor de eddele juncfer Hebe de solle unde moge beholden vor syck, dat idt dar byhenne ga unde bestandich blive. Dusses in orkunde unse ringe witliken uppe dat spacium dusses breves heten drucken, nach Christi gebort unses Heren dusent veirhundert in deme ses unde seventigesten jare, am mandage neyst na Laurencii martyris.
