Alta Fockensz op den Ham verklaart te hebben verkocht aan het convent van Aedwerd een gras buitendijks land aan de oude dijk, twee grazen land bij Ghertshuys en een gras buitendijks land bij Lyuppenhuys.

Ick Alta Fockensoen op den Ham bekenne ende betughe myt dessen openen breve dat yck heb voyrcoft ende overghegeven voyr my ende myn erffgenamen
den convente van Aedwerd een grass uterdyckes streckende anden olden dyck daer des convents land naest by leghet ande
wester syde ende aen dat suyd eynde ende myn broeders kynder naest by ligghen aen de oestersyd. Voert meer twe grase
landes ligghende yn dat leeghe theghen Gherts huys streckende aen den dijcke daer myn voyrscreven broeders kynder oeck
met twe grasen naest by ligghen. Voert meer een gras uterdycken wat myn dat gheleghen ys by Lyuppen huys
voer een summe gheldes de my her Bartholomeus kelner van Aedwert ynder tyd vul ende all betaelt hevet to mynen wylle.
Welke land yck Alta voyrscreven den voyrgenoemde convente van Aedwerd vry wyl leveren to eweghen tyden voer my ende myn naco-
melinghe to brukene. to verhuerene, to vercopenen ewelyck ende erfflijck ende oeren vryen wylle daer mede to doene uuthgesloten
al arghelist ende nye vonde. Hyer hebben an ende over ghewesen Egbert Rytskens, Gaelke Gaelkama, Herko Droch ende
anders guede lude ghenoech. In orkonden der waerheyt want yck Alta voyrscreven selve gheen seghell en bruke so hebben heere
Ghert myn kerckheere opden Ham ende her Hyddo kerckheere in Oestwolt oere seghell an dessen breff ghehangen om mynre
bede wylle int jaer ons heeren dusent vierhundert ende tsestich op Sunte Gregorius dach.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	36
Regestnr.	412
Olim	Arch. Klooster Aduard, inv.nr. 3, reg. 6. Reg. Feith 1460.19.
Jaar	1460
Datumcode	Gregor

x

x

Commentaar	Met de zegels van Ghert, kerkheer te Den Ham, en Hyddo, kerkheer te Oostwold

x

Materiaal	perkament

x