| Nummer:msk525012 | Datum:4. Mai 1426 | Overlevering:Auszug | Vindplaats:Manuskripte Kunst, inv.nr. 525, S. 012, nr. 10 |
Schiedsspruch des Rathes von Groningen und der Prälaten und Häuptlinge des Hunsingo und Fivelgo über die Streitigkeiten zwischen Ocko tom Brok und. Focko Ukena, seinen Söhnen und Imelo von Grimersum, namentlich wegen Oldersum, Larrelt, des Burgbaues daselbst, der Verlassenschaft der Folkeld, der Liegenschaften des Enno Haytadisna, des neuen Deichs zu Norden u. A. m.
In den name onss Heren. Wij borghermeistere ende raed der stad von Groningen unde prelaten ende hoeftlingen van Honseghe ende van Fyvelghe landen als scheides ende ghekoerne zoenslude in der schelinge ende twydracht de der ghevallen synt zeder den maendaghe na Palmen nu naest verleden tusschen den eerbaren jonker Ocken to Broeck, to Auwerek ende Emeden etc. hoeftling in Oestfreeslant ende syne vrende an de ene sijd, ende Focke Ukena hoeftling to Lere, synen kinderen ende Imelen hoeftling to Grymmessum ende oer vrenden an de ander sijd, by namen als van Oldersum ende tymeringe ende vestinge to Lerlete ende van anderen articulen na inholt des compromiss ende beghifnisse de sie ghelovet, ghesworen ende beseghelt hebben stede ende vast na onser ontkennynge onverbroken to holden bij alsulker pene alst compromiss inholdende is. Soe seggen wij na recht ende vrentscap na den besten rechte int eerste, dat Bruen Klinge borghermeister in Groningen ende Henrick Beyer, raetman ende hoeftman in Groningen sullen van stonden an jonker Ocken vorghenoemt Oldersum weder overleveren in alsulken ghenoghe ende manieren, alst Focken Ukena voerscr. in voertijden in gheloven te waren is ghedaen, ende dat buten Focken ende synre vrende ovelenmoet, mit vorworden dat jonker Ocko voerscr. sal up den dach dat hem dat slot to Oldersum voerscr. overghelevert wort Focken voerscr. betalen off ghenoghelick bewissen alsulk ghelt als Focke voerscr. beholden wil bij sijnre consciencien, dat hem jonker Ocke voerscr. mit rechte schuldich is. Item van den golde, silverwerke ende ghelde, dat de edele joncfrow van den Broke heeft in gheloven ontfangen van Luttets kinder, daer Focke voerscr. up spreket ende meent, dattet Heben syns soens wyve mede tohoert te deelen, segge wij zoenlude voerscr. dattet sal up her Almer kerckheer to Erle ende Wijbet to Steghesdorpe staen daer een recht van te seggen, ende wat sie eendrachtleken Heben ende oer suster na lantrechte to seggen ende vynden, dat sal men hem gheven bynnen achte daghen na den dattet utgheseecht wort, ende daer sullen Ocke van Loquard ende Imele Heringhes voghet tot Emeden voer loven, dattet betaelt werde als voerscr. is. Ende dit recht sullen dese twe voerscr. scheideslude ut seggen eer Pinxterachtende[*] naest comende to Auwerckhove ende dat vol te brengen ende te holden by ener pene van hondert olden Franckschen schilden, halff to behoeff des abts ter Monte, broder Johans van den hilghen Gheeste der Prediker oerde, Bruen Klingens, Omekens ten Damme[*] ende Henne Beyers, ende halff to behoeff des rades to Groningen, der prelaten ende hoeftlingen de hijrmede overgheseten hebben. Item up den artikel de der gheroert is van Lerlete, dat jonker Ocko ansprekende is voer sijn etc., seggen wij voerscr. zoenslude om des willen dat Imele van Grymessum ende Frederic Harensoen, den God ghenedich sy, Imelen voerscr. broder, jonker Ocken naeste maghen synt ende mit oers selves lyffe ende guede daer to hulpen hebben na oere macht, dattet jonker Keno zeligher ghedachtnisse mit machte ghewonnen heeft, dat Imele ende Frederick voerscr. ende oer erfghenamen Lerlete sullen beholden ende besitten to ewighen daghen mit vorworden als hijr na ghescreven staet, als dat jonker Ocken voerghenoemt ende synen erfghenamen daer gheen schade ut scheen en sal, ende Imele ende Frederic voerghenoemt ende oer erfghenamen sullen bruken alsulke erve ende guede als Enno Haytes, dem God ghenedich sy, hadde bynnen ende buten Lerlete ende de heerlicheit bynnen Lerlete; ende willen Imele ende Frederic voerscr. off oer erfghenamen dat slot, dat sie beghonnen hebben bynnen Lerlete, voert tymmeren off een ander slot maken bynnen off buten in Lerlete, dat moghen sie tymmeren off tymmeren laten sunder enigherhande wederseggen vyer steensticke[*] ende den graven vyer roden[*] wijt, niet dicker noch wyder ten sy by willen jonker Ocken ende synre erfghenamen. Ende willen Imele ende Frederick voerscr. off oer erfghenamen dat slot, dat sie nu beghunnen hebben bynnen Lerlete, voert tymmeren off een ander slot maken in manieren als voerscr. is, soe sullen sie dat bolwerk, dat omme de buren van Lerlete gheet, yneffenen[*] ende schlicht maken by Pinxterachtende naest comende. Ende ist, dat sie dat slot dat sie beghunnen hebben holden ende tymmeren willen, soe sal de graven niet wijder wesen dan vyer roden, ten sy dat he up desen dach wijder ghegraven sy. Ende willen sie omme dat slot, dat sie voer oer slot holden willen bynnen off buten an Lerlete, soe moghen sie maken een bolwerck daromme beneden van eenre halven roden dick ende niet dicker ende daer na boven alst daer by boert. Mer willen Imele ende Frederick voerscr. off oer erfghenamen dat voerscr. slot dat sie beghunnen hebben vergaen laten off gheen ander tymmeren als voerscr. is, soe moghen sie dat bolwerck ende vestenisse staende holden, dat na omme Lerlete gheet. Item soe sollen Imele ende Frederick ende oer erfghenamen voerscr. jonker Ocken ende synen erfghenamen Lerlete ende dat slot bynnen off buten Lerlete tymmert na vorworden voerscr. openen tor ewighen daghen wen hem des ghenoghet sijn leef ende sijn leet darut to keren, ende dat buten Imelen ende Frederics ende oer erfghenamen schaden ende vermynringe oers rechtes. Item soe sullen Imele ende Frederic ende oer erfghenamen mitten buren van Lerlete ende oeren ondersaten jonker Ocken ende synen erfghenamen volghen in heervaert ghelijcks anderen hoeftlingen in Emeseghelant, als he off syne erfghenamen des van hem begheren, ende in schattinge sullen sie wesen ghelijck Ockens ende Brunghers syns broders to Loquard ondersaten. Item soe segghen wij voerghenoemde soenslude jonker Ocken ende synen erfghenamen to Twixele, Gheerdesweer, Folkerdeweer ende Wyvelsum[*] onderdanich te wesen in allen ghenoghe, als sie weren in der tijt ende voer der tijt, doe jonker Keno zeligher ghedachtnisse Haren, den God ghenedich sy, Imelen broder voerscr. Lerlete dede in gueden gheloven om des wilen, dattet Ennen Haytes voerghenoemt van oldes niet mit rechte en heeft toghehoert, ten sy dat jonker Ocke off syne erfghenamen Imelen, Frederick ende oeren erfghenamen omme ghonst, ruste ende vrede dat recht daerover willen gheven dat ons zoensluden nutte ende guet duncket wesen. Item soe sullen Imele ende Frederick voerscr. voer hem ende oeren erfghenamen jonker Ocken voerscr. ende synen erfghenamen loven, zekeren, ende weren, dat sie hem dese articulen voerscr. als van Lerlete to ewighen daghen holden willen. Ende weert zake, dat God verbeden moete, dat sie daeran ghebrecklich worden, dat men openbaer bewisen mochte, soe solden sie verboert hebben oer guet, erve, rechtinge ende heerlicheit, de sie hebben to Hinte, to behoeff jonker Ocken ende synre erfghenamen. Item van der betichte, dat jonker Ocken vrenden solden Imelen ende Frederick voerscr. hemelike Lerlete affghewonnen willen hebben zeder den maendaghe van Palmen, soe seggen wij zoenslude, dat Imele ende Frederic ende oer vrende jonker Ocken ende synen vrenden de to tale ende antworde setten, de dat hem gheseecht hebben, ende moghen sie dat dan ghenoch bewysen, soe sall jonker Ocke daerover richten als behoerlick is. Ende en willen sie nyemand to talen noch to antworde setten soe segge wy de betichte doot. Item up den artikel dat jonker Ocke sick beclaghet, dat Focke Ukens, syne kinder, ende Imele voerscr. etc, een verbynt teghen. hem hebben ghemaket etc., daer segge wij zoenslude up dat jonker Ocke ende syne vrende an de ene sijd, ende Focke ende syne kinder an de ander sijd sullen malkanderen holden alsulke breve (ende) lofte als sie malkanderen ghelovet ende beseghelt hebben, de de eerbar Deetmar Renghers borghermeister ende Henric Beyer tusschen hem beyden ghededinget hebben, ende daer mede alle ander breve ende lofte die sie malkanderen ghelovet hebben in oerre volre macht te bliven. Item up den artikel van Langermoniken, [*] dat Imele ende de van Lerlete hem oer koren[*] mit ghewelt ghenomen hebben etc., soe segge wij, dat Imele ende de van Lerlete sullen den provest ende synen convente to Langen dat keren na synen belope verwissen mit gulden ende silveren panden by den naesten soendaghe na onss Heren hemelvaerdesdach naest comende off anders also to vernoghen, datten provest ende den convente voerscr. daer an ghenoghet ende jonker Ocken daervan ghene redelike claghe meer an en kome. Item up den artikel dat Ude van Noerden solde gheslaghen hebben up den nyen lande den dijck etc., segge wij dat jonker Ocke ende Udo voerscr. mit oeren vrenden hem daer an bij hem selven sullen tusschen hijr ende sunte Johannes to myddensomer[*] naest comende vrentlike scheyden, ende doen sie dat niet ende daer meer worde van maken willen, soe holde wij dat tot onser ontkennynge off hem des ghenoghet. Item up de articulen voert gheroert van Lerlete, soe sal jonker Ocke voer hem ende voer syne erfghenamen mit synen naesten maghen ende vrenden, als Ocke ende Brungher to Loquard ghebroders, ende Dode Kenesma loven, zweren ende beseghelen Imelen ende Frederick voerscr. ende oeren erfghenamen, dat hem to ghesecht is van Lerlete slote, guede, erve ende heerlicheit, dat stede ende vast onverbroken to holden tot ewighen daghen als guede kerstene menschen.. Item in dat leste dese utseggen te besluten, soe segge wij zoenslude voerscr. om alle dese articulen voerscr. stede ende vast te holden, weert dat jonker Ocke, syne vrende off erfghenamen an de ene zijd, ende Focke ende Imele ende Frederick off oer erfghenamen voerscr. an de ander zijd off oer yenich hijr afftrede off dat utseggen niet holden en wolde, dat wij dan mitter stad van Groningen ende mitten landen als voerscr. is dat willen berichten mitten anderen parte, de dat holden wil na inholt des compromiss, daer dese zone eendrachtlike van der stad ende lande na utgheseecht is, want jonker Ocke ende syne vrende up de ene sijd ende Focke, Imele ende oer vrende van de ander sijd to ghegeven ende in oeren openen breven beseghelt hebben, daer wij ons an holden ende hopen, dat sie oer eere daeran niet vermynren en willen. In orkunde deser voerscr. eendrachticheit ende utsprekinge ende de, weert noet, mitter hant te vervolghene, soe hebbe wij borghermeistere ende raed der stad van Groningen voerscr. onser stadseghel, ende wij prelaten ende hoeftlingen van Hunseghelande des halfamptes seghel zamentlike voer onse lant, ende wij prelaten ende hoeftlinge van Fyvelghelande onses landes seghel an desen breeff ghehangen, ende want ick Ocko to Broeck, to Auwerck ende to Emeden, hoeftling in Oestfreeslant, voer my ende myne erfghenamen dese zone anneme soe loven, zekeren ende zweren ick ende myne maghe ende vrende, als Ocke to Loquard ende Brungher to Loquard ghebroders, ende Dode Kenesma dese voerscr. zone stede ende vast te holden tot ewighen daghen, ende hebben des to orkunde onse seghelen an denen breeff ghehangen, ende des ghelikes want ick Focke Ukens hoeftling to Leer voer my ende myne kindere, ende ick Imele hoeftling to Grymessum voer my ende myne erfghenamen ende voer Frederick mynen neven ende syne erfghenamen dese zone annemen, soe loven wij, zekeren ende zweren voer ons, voer onse kinder ende erfghenamen dese voerscr. zone stede ende vast te holden, ende des to orkunde soe heb ick Focke voerscr. voer' my, myne kindere ende erfghenamen mijn seghel ende ick Imele voerscr. voer my voer Frederick mynen neven voerscr., voer myne kinder ende erfghenamen mijn seghel an desen breeff ghehangen. Ghegeven in den jaer onss Heren dusent vierhundert ses ende twintich, des soendaghes na des hilghen Cruces daghe invencionis.
