Rolof van Peize, Ecbrecht van Groenenberg en enige anderen verklaren borg te blijven voor een schuld van de bisschop van Utrecht aan de heer van Keppel.

Alle denghenen, die desen brief zien zellen jof horen lesen, wi Hubrecht provest van Aldezeel, Arnold van Bucstel, prost van Arnem, Bernd, here van den Nahuse, Evert van Bevervorde, ridders, Herman van Laghe, Rolof van Peedse, Ecbrecht van Grunberghe, Bernd van Zudenna ende Sander van Obbure , knapen, maken cont mit kennis der wareyt, dat wi ghelovet hebben samenderhand als burghen voer onzen here, here Jan, bisscop van Utrecht, ende ghesekert in trouwen in hand heren Bernds, here van den Nahuse, ende heren Vrederix van der Ese, ridders, 200 marc Brab., te betalen den here van Keppel te behoef Hermans dochter van Laghe, die hi had bi sheren suster van Keppel, 100 marc te betalen op onser Vrowen Lichtmis over enen jaer ende die ander 100 marc op onser Vrowen Lichtmis daerna naestcomende den here van Keppel och heren Bernd van den Nahuse och heren Vrederic van der Ese och die houder is van desen brieve. Ende wert, dat wi des niet en deden, so soude wi incomen te Deventer in een herberghe, daerme ons inwiisde, te maninghen des heren van Keppel och heren Bernds och heren Vrederix och die houder weer des brieves daer te leysten 12 weken. Ende als die 12 weken om siin comen, so sel wi betalen in ghereden ghelden och mit panden, daerme dat ghelt an nemen mach in sulker maniren, dat elc enen goeden knape mit enen perde voer hem lecghen mach. Ende wert dat onser enech storve, so soud men him binnen eenre maent enen gheliken burghe weder setten. Ende en dede wi des niet, so soude wi incomen te Deventer te leysten, went wi enen gheliken burghe gheset hadden in des doden stat. In orconde ghegheven te Deventer int jaer ons Heren 1326 circa Conversio Pauli.

x

x

Fonds	Oorkondenboek Groningen en Drenthe
Nr	296
Olim	Naar Muller, Reg. en Rek. van het bisdom Utrecht, I, blz. 36.
Jaar	1326
Datumcode	caConPau

x

x

Materiaal	papier

x

Edities	P.J. Blok e.a., Oorkondenboek van Groningen en Drente, I (Groningen 1896), nr. 296.