Verbündniss Friesischer Gauen und der Stadt Groningen zur Bekräftigung der Upstallsbomschen Gesetze.

In Dei nomine. Amen. Nos gretmanni et iudices Westergo, Ostergo, prepositure Hummercensis, Hunsgo, Fiolgo, Aldammecht, Reydensis, Emesgonie ac Brocmannie, et consules in Groningge, cum ceteris iudicibus, partibus Frisie, nobis, ut debent, adherere volentibus, pro utilitate Frisonice libertatis, cum prelatis et clericis nostris in Groningge congregati, omnes articulos confederacionis et pacis contentos in presenti litera, cui hec presens cedula est transfixa, et sigillis nostrarum terrarum sigillata, quos articulos predecessores nostri in Upstalligisbame conceperunt et ordinaverunt, decrevimus nunc resuscitare, innovare et ratificare, et approbamus in hiis scriptis, cum addicione paucorum articulorum, ad sex annos, a data presencium continue et immediate sequentes, firmiter observandos. Primus articulus additus est iste, quod quicunque commiserit homicidium, et non satisfecerit de wergeldo, dum profugando transierit ad alienam terram inter terras nostras iam dictas, et ibidem detentus fuerit, si tunc amici interfecti conquerantur in terra ubi homicida detinetur, extune detentor illius homicide debet ipsum amovere infra octo dies immediate sequentes, aut solvet pro eo amicis interfecti 40 marcas antiquas et totidem iudicibus illius districtus. Item quicunque detinet aliquem aposthotam, et, si publice admonitus, ut ipsum amoveat, infra idem tempus non amoverit, condempnabitur iudicibus sui districtus ac conventui suo in 40 marcas antiquas; et idem detentor respondebit de omni forefacto, quod talis aposthota, quam diu secum est, perpetrabit; nec monasterium seu conventus, a quo talis aposthota exivit, ad aliquam teneatur emendam de quocunque delicto per dictum aposthotam in sua aposthasia perpetrato, nec etiam conventus suus emendam petat de tali aposthota de quibuscunque offensis suis illatis. Item tertius articulus additus, quod omnes gretmani singulorum districtuum zelandie, cum uno iudice et uno prelato, seu clerico ydoneo, singulis annis in octava beati Iohannis baptiste in Groningge compareant et causas pro utilitate communi pertractent, nec sine communi consilio negocio infecto recedant; contrarium facientes penam 20 marcarum singulis zelandiis persolvant. Item quod singuli districtus terrarum suos iudices eligant secundum consuetudinem suam hachtenus (!) in suis districtibus observatam. Item quod, nec consules in Groningge, nec aliqui terrarum predictarum, debeant detinere aliquem proscriptum alicuius loci, postquam iudicibus illius loci, ubi proscriptus moratur, fuerit publicatum, sub pena 20 marcarum antiquarum. Item nemo Frisonum teneatur ad aliquod theoloneum (!) insolitum et inconsuetum in zelandiis supradictis. Item sexto, si alicui zelandie, sive in orientali parte Frisie, sive occidentali, aut meridionali, seu australi parte de zelandiis supradictis, aliqua evidens necessitas gravatione vel inpugnatione, in preiudicium Frisonice libertatis et minus iuste contigerit imminere, tunc omnes alie zelandie, per nuncios ydoneos et literas patentes in adiutorium evocate, a die evocationis, de propinquo infra octo dies, et de longinquo infra quatuordecim dies, consiliando, auxiliando et manu armata defendendo, sub pena ducentarum marcarum antiquarum, singulis zelandiis applicandarum, ad talem zelandiam inpugnatam vel inpugnandam convenire debent et comparere, ac ibidem stare et manere non omittant, ad tantum tempus, quod talis zelandia, cui necessitas imminet, sit defensa et adiuta; et nemo ab inde recedere debet, nisi de communi consilio et unanimi omnium zelandiarum ibidem existentium et perdurantium, et non venientes nichilominus ad id faciendum compellentur. Item septimo, si aliqua questio contigerit oriri de aliquo vel aliquibus articulo vel articulis in aliqua zelandia de predictis in hiis literis principalibus et transfixis non expresso vel expressis, de tali, vel talibus unaqueque regio gaudebit suis privilegiis et constitucionibus specialibus, aut consuetudinibus solitis laudabilibus et honestis, iuri tamen non inimicis. Datum, actum, confederatum et transfixum ac sigillatum sub sigillis nostrarum terrarum predictarum, anno Domini M^o CCC^o sexagesimo primo, in crastina nativitatis beate Marie virginis gloriose.

x

x

Fonds	Ostfriesisches Urkundenbuch, I
Fol.nr.	S. 85
Nr	94
Olim	Gedr. 'naar den oorspronkelijken brief' in de Ommelander archiven, doos B. Nr. 16,' bei Driessen, monumenta Groningana II. p. 229, bei v. Schwartzenberg a. a. O. I. S. 225, bei v. Mieris mit dem falschen Datum 8. September a. a. O. III. S. 128, bei v. Idsinga, het Staatsrecht der vereen. Nederlanden, Leeuw. 1758, I. S. 437, und bei Lünig, Spic. Sec. I. S. 784.
Jaar	1361
Datumcode	cNatMar

x

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 94