| Nummer:oub0167 | Datum:11. Sept. 1398 | Overlevering:Editie | Vindplaats:Ostfriesisches Urkundenbuch, I, S. 141, nr. 167 |
Widzel, der Sohn Ocko's, und Folkmar Allena übertragen dem Herzoge Albrecht von Baiern ihre Besitzungen zu Eigenthum und erhalten dieselben als Erblehn zurück.
Wy Widzel, leeren Ocken soen, ende Volmaer, Allen soen, hoefflinge an gener syde der Eemse in Oestvrieslant, doen cond allen luden, dat wy voer ons ende onsen nacomelingen, mit onsen vryen willen, upgedragen ende quitgeschouden hebben, opdraghen ende quitschelden mit desen brieve, den hoechgeborn vorste, onsen lieven genadygen heer, hertoghe Aelbrecht van Beyeren, grave van Henegouwen, van Hollant, van Zeelant, ende her van Vrieslant, ende synen nacomelingen, den rechten eygendom van sulcken lande, heerlichede, goede ende sloten, als wy nu ter tyt houden, hebben ende besitten, tusschen der Eemsche ende der Jade in Oestvrieslant, dat te weten Broeck, [*] Auericlant, Herlingerlant, Oesterlangerlant, [*] Moermaenlant, [*] Lengederlant, [*] Noerderlant ende Enndserlant, [*] mit alsulcken eylanden, als daer to behoirt, daer buten gelegen, dat is te weten Borkyn, Just, Burse, Oesterende, Balteringe, Langoch, Spickeroch ende Wangeroch, [*] voert alle ander lande, de wy nu ter tyt hebben, houden ende besitten, ende noch vercrigen ende becraftygen sullen, binnen den voerscr. palen, of daer buten, de ons lieven genadygen heere voerscr. niet to en behoren, mit huse, sloote, heerlichede, hoge ende lage, rechte, reuten, vervallen nutschap ende proufyt, daer tho behoerende, mitten zeevonde, in alre manieren, als wy de nu ter tyt hebben, houden of hier namaels vercingen sullen, buten ons liefs heren landen voerscr., het zy gemeen te samen off verscheyden. Welcke lande, huse, sloote, heerlichede, hoge ende lage, rechte, rente, vervallen nutschap ende prouffyt, onse lieve genadyge heer, hertoge Aelbrecht voirn., ons weder verliet hefft, te houden van hem ende syn nacomelinghe, ons ende onse nacomelingen, tot enen onversterflicken erfleen. Ende waer dat sake, dat wy, off enich van onsen luden, storven sunder wyttachtige geboerte affter ons te laten, soe mochten wy, ende elcs van ons, de voerscr. heerlickheden ende goeden laeten ende bewysen te comen, na onser doot, op sulcke luden, een of meer, de ons genoegen sullen in onsen levende live, vreemde of maech, mit onsen testamente off openen breven, alst ons genoegen sal. Ende wie van onsen erven of andere, daer wy die goeden up bewysen sullen, als voerscr. is, ons of onse nacomelingen, versochte off versoecken sall, na onser of onser eniger doot, die sal onse lieve here, de hertoge voirn., of syn nacomelingen, die voirscr. heerlichede en goede verlien ende verleenen, in alre manieren, als onse lieve here vorser. ons gedaen hefft. Ende want wy van ons liefs heren lande verre geseten syn mit onsen heerlicheden, goede ende landen, dye ons onse lieve here verliet hefft, so hefft ons onse hieve heer, overmits vresen der wegen, dye daer tusschen gelegen syn, alsoe veel gratie gedaen, dat onse erven, of de gene daer onse goede op komen sullen na onser doot, binnen drien yaeren mit waen versoeck nyet versumen noch verbueren en sullen; ende hebben, mit onsen vrien wille, onsen lieven genadigen heer vorscr. hulde, eede ende manscap gedaen, als manne hoeren here schuldich synt te doen, ende geloefft denselven onsen lieven heere in goeden trouwen te dienen, ende hun syn palen van Vrieslant te helpen houden, ende de te starcken tegens allen dengenen, de hun daerin hinderen ende deren wilden of ongehoersamich worden, behoudelick, dat wy hun ongehouden sullen wesen te dienen buten den palen van Vrieslant, ten waer dat wyt van onsen goeden wille doen wilden. Ende onse leve heer vorscr. hefft ons weder geloofft, ons te starcken. in den goeden, landen ende herlicheden voirscr., off ons yement in den vorscr. goeden ende heerlicheden hinderen of crencken wilde, als een heer synen lienmannen schuldich in te doen, als wy hun des vermanen of doen vermanen. Voort wanneer, by onsen of onser enyger doot, onsen erven, off diegene, dye wy an den voerscr. goeden bewysen sullen, die selve heerlichede ende goede van onsen leven here, of van synen nacomelingen, versoecken of ontfaen sullen, soe sullen diesulve onse erven, of de ghene, de die goede versoeken of ontfaen sullen, alle dese voerscr. vorwarden vernuwen ende geloeven, in alre manieren, als vorscr. is. In oerkonde desen brieve bezeghelt mit onsen zeghelen, hier an gehangen. Geschreven op ten elfften dach van der maent van September, int iaer ons Heren dusent driehondert acht ende tnegentich.
